मोडलिङमा डेब्यु गरेकी पौडेलसँग पुष्प खड्काको रोमान्स (भिडियोसहित)

काठमाडौं । चलचित्र उद्योगमा ख्यातिप्राप्त कलाकर्मीहरुको सहकार्यमा आधुनिक गीतको अडियो र यसको भिडियो ‘माया बन्धन यो’ एकसाथ सार्वजनिक गरिएको छ । निर्माण टिमले ओएसआर डिजिटलको अफिसियल युट्युव च्यानलमार्फत सार्वजनिक गरेको हो ।

यो गीतमा प्रताप दास र कविता श्रेष्ठको संयुक्त आवाज सुन्न सकिन्छ । बाबु प्रधानले गीतको अडियो एरेन्ज गरेका हुन् । राजेशकुमार श्रेष्ठको शब्दमा सजिएको गीतको म्युजिक एलिस कार्कीले तयार पारेका हुन् ।

गीतको भिडियोमा पुष्प खड्कासँग सुमित्रा पौडेलले अभिनयमा अनस्क्रिन रोमान्स गरेकी छन् । यसै गीतबाट मोडलिङमा डेब्यु गरेकी पौडेलले यो गीत आफ्ना लागि ड्रिम प्रोजेक्ट रहेको प्रतिक्रिया दिइन् । सानैंदेखी अभिनयमा आउने मन थियो, उनले भनिन्, ‘अध्ययनमा ब्यस्तताले त्यसबेला सम्भव भएन । सबैको आ–आफ्नो समय आउँछ भनेजस्तै मेरो पनि बिहे भइसकेपछि २ नानीबाबु जन्मिएपछि बल्ल चाहना पुरा गरेकी छु ।’

गीत सार्वजनिक भएपछि पुष्प खड्काले चलचित्र उद्योगमा नाम चलेका व्यक्तिहरुको सहकार्य रहेको यो प्रोजेक्टको अडियो मन परेपछि भिडियोमा काम गर्न तयार भएको प्रतिक्रिया दिए । उनले भने, ‘अडियो मन परेपछि भिडियोँमा काम गरेँ । अहिले म अभिनित चलचित्र तिम्रो मेरो साथ को प्रमोशनमा भएकाले यो गीतको प्रेस मिटमा उपस्थित हुन सकिनँ । तर, गीतको भिडियो हेरेपछि असाध्यै उत्साहित भएको छु ।’

गीतको भिडियो चितवनको चर्चित झरना जलभिरे लगायतका विभिन्न स्थानमा खिचिएको छ । ओम प्रसाईँ भिडियोका डिओपी हुन् । असाध्यै कलात्मक ढंगले उनले आफ्नो सिनेम्याटोग्राफीको क्षमता यसमा पनि दिएका छन् ।

भिडियोका निर्देशक सन्दिप भुजेल हुन् । सन्दिप पछिल्लो समय एकपछि अर्को हिट गीत निर्देशन गरिरहेका छन् । गीतको भिडियोलाई मल्टि ट्यालेन्टेड ओम प्रसाईँले सम्पादन गरेका हुन् । उनैले भिडियोको स्क्रिन प्ले, कलर ग्रेडिङ लगायतका काम समेत गरेका छन् ।

यो गीतले एउटा प्रेमिल जोडीको माया भिज्युअल मार्फत देखाउन खोजेको निर्देशक सन्दिप भुजेलले बताए । उनले भने, ‘हामीले यो गीत निर्माणमा असाध्यै मिहेनत गरेका छौं । मलाई लाग्छ यो गीत र भिडियोलाई दर्शकले निकै माया गर्नेछन् ।’ चिसो मौसमका बाबजुद २ दिन छायांकन गरेर भिडियोको छायांकन गरिएको थियो ।