‘मैले सिकेका ज्ञानहरुलाई रोल्पा मात्रै होइन, देशैभरी बाँड्न सक्छु’

माओवादीले १० वर्षसम्म जनयुद्ध चलाएको केन्द्र हो रोल्पा । त्यही रोल्पाली हुन् ओनसरी घर्ती । उनी तत्कालीन जनयुद्धकी एउटी नायीका मात्रै होइनन्, नेपालको पहिलो महिला सभामुख पनि हुन् । जसले संसदलाई सफलतापूर्वक ह्याडिलिङ गरिन् । रोल्पा जिल्लाको जंकोट –१ माडीचौरमा निम्न मध्यमवर्गीय मगर परिवारमा २०३४ कार्तिक २८ मा जन्मिएकी घर्ती सानैदेखि खेलकुद र नृत्यमा अभिरुची राख्ने गर्थिन् । औपचारिक रूपमा माध्यमिक तहसम्मको अध्ययन पूरा गरेपछि भने उनी राजनीतिमा सक्रिय भइन् । २०४६ सालदेखि विद्यार्थी आन्दोलनबाट राजनीतिमा प्रवेश गरेकी घर्ती २०४८ सालमा विद्यार्थी संगठनको जिल्ला कोषाध्यक्ष र महिला जिल्ला सदस्य हुँदै तत्कालिन नेकपा (एकता केन्द्र) को पार्टी सदस्यता प्राप्त गरिन् । माओवादीले २०५२ सालदेखि सुरु गरेको सशस्त्र संघर्षमा रोल्पाबाट आबद्ध हुने थोरै महिला लडाकुमध्ये घर्ती एक हुन् । ०७० को संविधानसभा निर्वाचनमा रोल्पा क्षेत्र नं. २ बाट निर्वाचित घर्ती ०६४ र ०७० मा समानुपातिक सांसद बनेकी थिएन् । उनी नेपाल कम्युनिष्ट पार्टी (नेकपा) को प्रदेश–५ की अध्यक्ष पनि हुन् । हाल नेकपा माओवादी केन्द्रको स्थायी कमिटी सदस्य पनि हुुन् । मंसिर ४ गते हुन गइरहेको प्रतिनिधिसभा र प्रदेशको निर्वाचनमा सत्तारुढ गठबन्धनका तर्फबाट काठमाडौं क्षेत्र नम्बर २ मा प्रतिनिधिसभा सदस्यको उम्मेदवार बनेकी घर्तीका योजनाहरु केके छन् ? यसै सेरोफेरोमा केन्द्रित रहेका गरिएको कुराकानी :

तपाई नेपालको पहिलो महिना सभामुख पनि । तपाईको कार्यकालमा गर्नुभएका राम्रा कामहरु केके हुन् ?
मैले मेरो कार्यकालमा एक सय भन्दा बढी कानुनहरु निर्माण भयो । म सभामुख भएका बेला मेरो विशेष पहलमा महिला हकहित तथा संघ÷प्रदेश र स्थानीयको आवश्यकताका आधारमा कानुन परिमार्जन गरियो । वर्षाेदेखि जरा गाडेर बसेको मुलुकी ऐनलाई परिमार्जन गर्न सकियो । मौलिक हकसम्बन्धी विभिन्न कानुन निर्माण भयो । उत्तम कुरा त महिला हकहितका लागि कानुन निर्माण गर्न सफल भएँ । महिलाको ४० प्रतिशत सहभागिता, अध्यक्ष, उपाध्यक्ष तथा प्रमुख उपप्रमुखमा एक महिला नै हुनुपर्ने भन्ने मेरै बेलामा भएको हो । त्यस्तै पैतृक सम्पत्तिमा जम्नसिद्ध छोरा सरह छोरीको पनि समान हक हुनुपर्ने व्यवस्था ल्याइयो । यो एउटा ठूलो उपलब्धि पनि हो ।

तपाईका चुनावी एजेण्डाहरु चाँही केके छन् त ?
हरेक तह र तप्काका जनसमुदायको भावनालाई सम्बोधन हुने गरी कानुन निर्माण गर्ने र विकास निर्माणका सवालमा जनताको पहुँच सरकारसम्म पु¥याउने छु । . स्थानीय तवरमा शंखरापुर नगरपालिकालाई पर्यटकीय नगरी बनाउने छु । कागेश्वर मनोहरालाई स्पोर्ट सिटी बनाउने र काठमाडौं महानगरपालिकभित्र पर्ने वडा नं. ९ र ३२ को शहरलाई कोर सिटी अर्थात् सफा, सुन्दर र गुणस्तरीय विकास गराउने छु । यस क्षेत्रमा रहेका करिडोरको समस्यादेखि जग्गा एकीकरणको समस्या, मुआब्जाका समस्या लगायतका विभिन्न समस्याहरु समाधानका लागि पहल गर्नेछु । जनताको गाँस बास र कपासको व्यवस्था तथा जनताको दैनिक जीवनमा आईपर्ने खानेपानी, स्वास्थ्य, शिक्षा लगायतका क्षेत्रमा सुधारका लागि विशेष पहल गर्नेछु ।

तपाईको निर्वाचन क्षेत्रमा थुप्रै समस्याहरु छन् । तपाईले जित्नु भएपछि ती समस्या समाधान गर्नुहन्छ त ?
यहाँ मुख्यतः बाटोको समस्या छ । त्यस्तै यहाँ खानेपानीको बिकराल समस्या छ । जहाँ मेलम्चीको पानीको पहुँच नपुगेको स्थान पनि छ । सुन्दरी जलको पहुँच नभएको स्थान पनि छ । अव्यवस्थित करिडेर, अव्यवस्थित ढल निकास तथा जग्गा एकीकरणको कुरा समयमै कार्यान्वयन नहुँदा जनतामा समस्यामा छन् । त्यस्तै सफा सुन्दर र गुणस्तरीय विकास हुनुपर्ने जनताको माग छ । नजिकै रहेको शिवपुरी वन्यजन्तु आरक्षणबाट जंगली जनावरहरु आएर मानिसलाई क्षति पु¥याउने समेत गरेका छन् । त्यसको व्यवस्थापन समेत गर्नुछ ।

तपाई रोल्पाको मान्छे, किन काठमाडौंबाट चुनाव लड्दै हुनुहुन्छ ?
मेरो उम्मेदवारी महिलाहरुको प्रतिनिधित्व र प्रोत्साहन स्वरुप हो । त्यस्तै मेरो पार्टी र गठबन्धनले यस क्षेत्रमा नै महिला उम्मेदवार हुनुपर्छ भनेर निर्णय ग¥यो । त्यस्तै एक राजनीतिज्ञका लागि भुगोलको सीमा हुँदैन । जनताको सेवा जहाँ गएर पनि गर्न सकिन्छ । म पनि जनताको सेवा गर्न तम्तयार भएकी हुँ । मलाई अवसर दिनुस् । म गरेर देखाउने छु । अर्काे कुरा काठमाडौं भनेको विज्ञ र वृद्धिजिवीहरुको बसोबास रहेको स्थान पनि हो, यहाँ उनीहरुसँगै बसेर काम गर्दा सिकेका ज्ञानहरुलाई मैले रोल्पा मात्रै होइन, देशैभरी बाँड्न सक्छु ।

यो निर्वाचनमा माओवादीलाई नै मत किन दिने ?
यस पटक जनताले माओवादीलाई मात्रै होइन, सिंगो गठबन्धनलाई मत दिनुपर्छ । हामी प्रतिगमनको विरुद्धमा र परिवर्तनको पक्षमा उभिएका छौं । संविधानको रक्षा र स्थिर सरकार बनाउँदै जनताको समृद्धिको लक्ष्य राखेका छौं । परिवर्तन खोजिरहनु भएका जनताले गठबन्धनलाई भोट दिनुहुन्छ । त्यस्तै यो पटक महिलालाई भोट दिनुहोस् भन्न चाहन्छु । महिला कमजोर छैनन् । काम गर्न सक्छन् भन्ने म प्रमाणित गरिदिनेछु ।

तपाई चुनावी अभियानमा जनताको घरदैलोमा हुनुहुन्छ । मतदाताबाट कस्तो प्रतिक्रिया पाइरहनु भएको छ ?
जनसमुदायहरुले मलाई निकै स्वागत गर्नुभएको छ । उहाँहरुले आफ्नै छोरी, चेली, दिदीबहिनीको रुपमा लिनुभएको छ । समुदायहरुसँग हाम्रो छलफल हुन्छ । त्यसबेला उहाँहरुको तर्फबाट पनि केही प्रश्नहरु आउँछन्, म त्यसको जवाफ दिन्छु र उहाँहरु मबाट निक्कै आशावादी पनि हुनुहुन्छ र मलाई सहयोग गर्ने प्रतिवद्धता पनि जनाउनुभएको छ । २ नम्बर क्षेत्रका वासिन्दाहरुमा एक प्रकारको उत्साह छ ।

चुनाव जित्नेमा कत्तिको विश्वास छ ?
चुनाव जित्नेमा म ढुक्क छु । उसै पनि गठबन्धनको मतले हामी धेरै माथि छांै । त्यस्तै चुनावी प्रचार प्रसारमा जनताको प्रतिक्रियाले पनि हामी निकै अगाडि छौं । त्यसैलेम ढुक्कसँग चुनाव जित्छु ।

प्रस्तुती : पुष्पा महरा