बुद्ध एयर जहाजको टायर पड्कियो, गौतमबुद्ध विमानस्थलको उडान अवतरण रोकियो

काठमाडौँ । बुद्ध एयरको जहाजको टायर पड्किएपछि बिहान ११ बजेदेखि गौतमबुद्ध अन्तर्राष्ट्रिय विमानस्थलको उडान अवतरण रोकिएको छ। भैरहवास्थित गौतमबुद्ध विमानस्थलबाट काठमाडौंको लागि उडान गर्न रनवेमा रनिङ गरेको उडान नं ८५६ को जहाजको टायर पड्किएको विमानस्थल सुरक्षा कार्यालयका प्रहरी सहायक निरीक्षक होम बहादुर मिदुन मगरले जानकारी दिए।

अहिले उक्त जहाज रनवेमै रोकिएको छ भने अरू जहाजको उडान र अवतरण अवरूद्ध भएको मगरले बताए। रनवेमा रनिङकै क्रममा जहाजको अगाडिको टायर पड्किए पनि जहाज र यात्रुहरूमा कुनै क्षति भने नभएको उनले बताए। जहाजमा दुई जना बालबालिकासहित ७० जना यात्रु थिए।