प्रधानमन्त्री ओली र नेपालबीच टेलिफोनमा कुराकानी

काठमाडौं । प्रधानमन्त्री केपी शर्मा ओली र नेता माधवकुमार नेपालबीच टेलिफोन संवाद भएको छ । शनिबार दिउँसो दुई नेताबीच कुराकानी भएको प्रधानमन्त्री ओलीका सञ्चारविज्ञ रामशरण बजगाईले जानकारी दिए ।

यसअघि गत बिहीबार राती ओली र नेपालबीच टेलिफोनमा कुराकानी भएको थियो । एमाले एकताको चर्चा चलिरहेको बेला दुई नेताबीचको फोन संवाद बढिरहेको छ । केही दिनयता दिनहुँजसो संवादमा रहेका नेताहरुले आज पनि ललितपुरस्थित समिट होटेलमा छलफल गरेका हुन् ।

छलफलमा अध्यक्ष ओलीका तर्फबाट नेताहरु विष्णुप्रसाद पौडेल, शंकर पोखरेल र सुवासचन्द्र नेवाङ सहभागी थिए । वरिष्ठ नेता झलनाथ खनाल–नेपाल पक्षका घनश्याम भुसाल सुरेन्द्र पाण्डे, गोकर्ण विष्ट र भीम आचार्य सहभागी थिए ।