कांग्रेसले बोलायो संसदीय दल कार्यसमितिको बैठक

काठमाडौँ । कांग्रेसले संसदीय दल कार्यसमितिको बैठक बोलाएको छ । बुधबार दिउँसो साढे २ बजे संसद भवनको ल्होत्से हलमा बस्ने गरी बैठक बोलाएको हो । बैठकमा समसामयिक राजनीतिक विषयहरु र संसदको बजेट अधिवेशन लगायत विषयमा छलफल हुने प्रमुख सचेतक बालकृष्ण खाँणले जानकारी दिए ।

प्रधानमन्त्रीले विश्वासको मत लिने प्रयोजनका लागि गत २७ बैशाखमा संसदको विशेष अधिवेशन बसेको थियो । तर, प्रधानमन्त्रीले विश्वासको मत नपाएपछि स्थगित भएको संसद अधिवेशन सरकारले त्यसै राति अन्त्य गराएको थियो ।

३० बैशाखमै प्रधानमन्त्री केपी ओली पुनः संविधानको धारा ७६ ९३० अनुसार अल्पमतको प्रधानमन्त्री नियुक्त भएका छन् । अब प्रधानमन्त्रीले ३० दिनभित्र विश्वासको मत लिनुपर्ने हुन्छ । कांग्रेस प्रधानमन्त्रीले विश्वासको मत लिन असफल बनाउने रणनीतिमा छ ।