युवा नेता भण्डारी भन्छन्, तपाईहरूको खरानीमाथी दुस्मनले भ्रमको डरलाग्दो महल नबनाउन्

देशकै सबैभन्दा ठूलो र शक्तिशाली पार्टी हो नेपाल कम्युनिष्ट पार्टी (नेकपा) । पार्टीभित्र छलफल, बहस, अन्तरक्रिया, सम्वाद र चित्त माझामाझ जारी छ । अहिले पार्टीभित्रको यो छलफललाई बाहिर छरपस्ट पारेर उत्तेजित बनाउने र जग हसाउने काम भइरहेको छ । (वाद, विवाद र सम्वाद, एकता, संघर्ष र रूपान्तरण) को विधिबाट समस्याको हल गर्न सकिने आधारहरु प्रसस्त छन् ।

पार्टीभित्र देखापरेका अनेकौ समस्यालाई समाधान गर्न नसकिने होइन । त्यसका लागि पार्टीका सबै छलफल, बहस, निर्णय प्रक्रिया, गतिविधिहरू खुल्ला, पारदर्शी र सार्वजनिक बनाउन सक्नुपर्छ । यदी त्यसो गर्न सकिँदैन भने पनि पार्टी र नेताहरूका समस्या कमिटी, विधी र प्रणाली सम्मत ढंगले हल गर्न सकिन्छ ।

यस्तो छ ११ सुझाब
१. सामाजिक सञ्जालमा नेकपाको बैठक र छलफलको विषयमा भइरहेका अतिरञ्जित, अनावश्यक, आरोप–प्रत्यारोप, भण्डाफोर, तिक्तता, एक अर्कालाई नङग्याऊने, गुठजन्य क्रियाकलाप पार्टी एकता विरोधी हर्कतहरु हुन् । यस्ता हर्कत र गतिविधिहरू तत्काल बन्द गरौं ।

२. पुरानो पुस्ताले गल्ती गर्यो भने नयाँ पुस्ताले सकारात्मक खवरदारी गर्ने, सच्याऊने, रूपान्तरण गर्ने र पहल बढाऊने हिम्मत गर्नै पर्दछ । सधैं पूरानो पुस्ताको भरमा मात्रै पार्टी सञ्चालन भइरहन सक्दैन । त्यसका लागि युवा पुस्ता जाग्न जरुरी छ । र युवाहरु जागौं ।

३. नेताहरूको पुरानो थोत्रो गुठगत स्वार्थमा हुने गुटबन्दी, चरम व्यक्तिवाद, आत्मकेन्द्रीत र स्वार्थ केन्द्रीत प्रवृत्तिले संस्थागत पार्टी जीवन र प्रणाली कमजोर भएको छ । अनावश्यक भण्डाफोर र टकरावले बिनाश र क्षति मात्र हात लाग्ने निश्चित छ । अब बैचारिक, विधिगत र राजनीतिक छलफलमा केन्द्रित होऔं ।

४. नेकपा नामक २ पाईलट भएको जहाज तपाईहरू कै असावधानी र लापरवाहीका कारण दुर्घटनामा परेको अवस्थामा तपाईहरूको खरानीमाथी दुस्मनले भ्रमको डरलाग्दो महल बनाउने छ । नेताहरूको परिक्षा संकटको बेलामा नै हुने हो । आशा गरौं नेताहरूले यो संकटलाई पार लगाउन दुबै नेता सक्षम र प्रतिवद्ध हुनेछन् ।

५. विगतमा जे आधारमा दुई पार्टीबीच एकता भएको थियो । तिनै आधारहरू, समझदारीहरू, पार्टी विधान, सहकार्य र विश्वासको वातावरण निर्माण गरी पार्टी एकताको रक्षा गरौं । देश र जनताको आशा र भरोसालाई सुदृढ गर्न योगदान गरौं ।

६. माथी नेताहरू मात्र बस्दा झन समस्या बल्झियो । हल भएन र गुजुल्टियो भने तल फर्किनु पर्छ । सचिवालय र स्थायी समितिमा समस्या हल भएन भने अब तत्काल केन्द्रीय समिति बैठक बसौं ।

७. केन्द्रीय समिति पार्टी एकता, सामुहिक नेतृत्व प्रणाली, विधी र प्रणाली सम्मत पार्टी र जनताको जनवाद हुँदै समाजवाद निर्माणको पक्षमा छ । अघिल्लो केन्द्रीय समिति बैठकका निर्णयहरू अक्षरस पालना गरौं । केन्द्रीय समिति पार्टी एकताको पक्षमा छ र पार्टी एकताको रक्षा गर्न सक्षम छ । त्यसकारण माथिल्लो तहको निर्णयले मात्रै पार्टीलाई अनिर्णयको बन्दी बनाउन पाइँदैन । त्यसका लागि केन्द्रिय समितिसम्म छलफल चलाइनुपर्छ ।

८. देशभरीका कार्यकर्ताहरू र आम नेपाली जनता पार्टी एकताको पक्षमा छन् । गुट, फुट, तुच्छ स्वार्थ समुह, गिरोह र चरम आत्मकेन्द्रीत व्यक्तिवादबाट नेकपा बन्दैन र बच्दैन । अब जसरी भए पनि आफ्ना स्वार्थ त्यागेर पार्टी बचाउन लाग्नुपर्छ ।

९. नेकपा भित्रका राजनीतिक चेतना भएका युवा साथीहरू थोत्रो, कुहिएर दुर्गन्धित भएका गुठहरूको झुण्डलाई अस्वीकार, खारेज र विघटन गरौं । नयाँ आधारमा नेकपा सुदृढ गरौं । अनावश्यक गुट र झुण्डका कारण जनता केन्द्रित पार्टी नेता केन्द्रित भएको छ । यसलाई पार्टीलाई सही दिशामा लैजान सक्दैन । त्यसका लागि युवाहरु सचेत बन्दै गुट भत्काउन लाग्नुपर्छ ।

१०. गुटको कुहिएको दुर्गन्धित सिनो भाग लगाउँदै ‘मेरो भागमा फलमासु र उसको भागमा हड्डी !’ ‘मेरो भागमा टाउको र उसको भागमा पुच्छर !’ भन्दै कोही मख्ख पर्दै र कोही रुँदै डङ्डंति गन्हाएको गुटको सिनोमा भएको औंसाहा कीराहरूले ज्यूँदो स्वस्थ मानिसलाई पनि रोगी बनाएर मार्नेछ भन्ने बेलैमा बुझौं ।

११. नेकपा बचाउँदै संमृद्ध मुलुक बनाउन र नयाँ विज्ञान र प्रविधिबाट दिक्षित सचेत पुस्ताले खोजेको राजनीति, संस्कार, विचार, पार्टी र नेतृत्व विकास गर्न रचनात्मक बहसको थालनी गरौं । द्वन्द्वात्मक भौतिकवादी बनौं । सकारात्मक, श्रृजनात्मक, सामुहिक, रचनात्मक, स्वतन्त्र र वैज्ञानिक ढंगले सोच्ने संस्कारको विकास गरौं । पुरानो नेतृत्वको पुस्तालाई सम्मान गर्दै नेतृत्वको पुस्तान्तरणको लागि सामुहिक रूपमा, बैचारिक, राजनीतिक, संगठनात्मक, सांस्कृतिक र मानसिक तयारी गरौं ।

(भण्डारी नेपाल कम्युनिष्ट पार्टी (नेकपा) का केन्द्रीय सदस्य हुन् ।)