अर्थमन्त्री खतिवडाविरुद्ध सर्वोच्चमा मुद्धा हाल्ने चेतावनी

काठमाडौं । एक सांसदले अर्थमन्त्री युवराज खतिवडा विरुद्ध सर्वोच्च अदालतमा मुद्दा हाल्ने चेतावनी दिएका छन । बजेटमा विभेद गरेको भन्दै समाजवादी पार्टीका सांसद प्रदीप यादवले यस्तो चेतावनी दिएका हुन्।

बजेटको खर्च कटौती प्रस्तावमाथि संसदमा बोल्दै सरकारले संघीयता विपरित बजेट ल्याएको यादवले आरोप लगाए ।

प्रदेश २ लाई बजेटमा विभेद भएको भन्दै उनले अन्य प्रदेशभन्दा कम बजेट दिइएको आरोप लगाए। गण्डकी र सुदुरपश्चिमभन्दा कम बजेट प्रदेश २ लाई दिइएको उनको भनाई छ।

संघीयता काम छैन भन्ने देखाउन यस्तो गरिएको आरोप यादवले बताए। यसरी भएको विभेद विरुद्ध न्यायका लागि जाने उनले बताए।

मानव विकास सूचकांक प्रदेशमा पछाडि रहेको र गरिबी धेरै भएको प्रदेशलाई संघले बजेट दिन नखोजेको हो कि सूत्र नमिलेको हो भनी प्रश्न सोधे।

अन्तर सरकारी वित्तीय हस्तान्तरणमा प्रदेश २ लाई विभेद भएको उनले बताए ।

२ अर्ब थप गर्नुपर्ने माग उनले पेश गरे। बजेटको बाँडफाँटमा विभेद किन भन्दै उनले उत्पादन र कर उठाउने प्रदेशलाई किन विभेद गरेको भनि प्रश्न उठाए।

प्रदेश २ लाई २ करोड मात्र अनुदान दिने, कर्णाली १ अर्ब ४९ करोड पाउने, सुदूरपश्मिचले १ अर्ब २९ करोड अनुदान पाउने किन ? भन्दै उनले प्रश्न उठाए। प्रदेश २ लाई पनि विकास चाहिने भन्दै उनले यसरी विभेद गर्न नमिल्ने बताए।