टनकपुरमा भयानक दुर्घटना, नौजनाको मृत्यु

महेन्द्रनगर । भारतमा प्रसिद्ध तीर्थस्थल पुर्णागिरी मन्दिर दर्शनका लागि जाँदै गरेका तीर्थयात्रीहरुको ठुलो समुहलाई टिप्परले पेल्दा नौ जनाको घटनास्थलमै मृत्यु भएको छ । घटनामा कैयौं श्रद्धालु घाइते भएका छन् ।

नेपालको पश्चिमी सीमानाका कञ्चनपुरको ब्रम्ह्देवसँग सिमा जोडिएको टनकपुर बजार नजिकै बिहान ६ बजे सो दुर्घटना भएको भारतीय च्यानल ‘समाचार प्लस’ उत्तराखण्डका सम्बाददाता दीपक फुलेराले जानकारी दिए ।

घटनामा पर्नेहरु सबै युपी राज्यको नवाजगंजका श्रद्धालुहरु हुन् । उनीहरु पुर्णागिरी धाम दर्शनका लागि डोली लिएर जाँदै थिए ।

घाइतेलाई तत्काल उद्धार गरी नजिकका अस्पतालमा भर्ना गरिएको छ । तीर्थयात्रीलाई पेलेर फरार टिप्पर प्रहरीले नियन्त्रणमा लिएर अनुसन्धान थालेको बताईको छ ।