क्यासिनो छिरेर जुवा खेल्ने २३ पक्राउ

काठमाडौँ । गैरकानूनीरुपमा क्यासिनो प्रवेश गरी जुवा खेल्ने र खेलाउने २३ जनालाई प्रहरीले पक्राउ गरेको छ ।

महानगरीय प्रहरी परिसरबाट खटिएको प्रहरी टोलीले क्यासिनो माजोङ छिरेर जुवा खेल्दै गरेका १२ जना र जुवा खेल्न क्यासिनो प्रवेश गराउने कर्मचारी तथा जुवा खेलाउने ११ जनालाई आज बिहान ३ बजे पक्राउ गरेको हो ।

महानगरीय प्रहरी परिसरले आज यहाँ आयोजित पत्रकार सम्मेलनमा पक्राउ परेका २३ जनामध्ये ४ जना विदेशी रहेकाले उनीहरुलाई छाडिएको र बाँकी १९ जनालाई नियन्त्रणमा लिइएको जनाएको छ ।

परिसरका प्रमुख रवीन्द्र धानुकले क्यासिनोले नेपालीलाई नक्कली कार्ड बनाए प्रवेश गराई जुवा खेलाइरहेको भन्ने सूचनाका आधारमा जाँच गर्दा उनीहरू पक्राउ परेको बताए ।

पक्राउ परेकासँग प्रहरीले ४ लाख ४३ हजार २४६ नेपाली रुपैयाँ, भारतीय रुपैयाँ १ सय, अरेवियन दिनार १ सय, अमेरिकन डलर १३०, एक हजार दरका सिक्का २७ थान, ५ सय दरका सिक्का दुई थान, १ सय दरका सिक्का ६ थान र ७ लाख नेपाली रुपैयाँको चेक एक थान बरामद गरेको छ ।