पत्रकारलाई सहजरुपमा समाचार संकलन गर्ने व्यवस्था गर्न सरकार सँगमाग

प्रमुख सूचना आयुक्त कृष्णहरि बाँस्कोटाले मंसिर २१ गते हुने प्रतिनिधिसभा तथा प्रदेशसभा निर्वाचन तथा मतगणनासम्म पत्रकारलाई सहजरुपमा समाचार संकलन गर्ने व्यवस्था गरिदिन निर्वाचन आयोगलाई आग्रह गरेका छन् । 

नेपाल पत्रकार महासंघले आज भक्तपुरमा आयोजना गरेको ‘प्रेस स्वतन्त्रता र मताधिकार’ अन्तरक्रियामा उनले सूचना पाउने अधिकारबाट पत्रकारलाई वञ्चित गर्न नहुने बताए । 

“निर्वाचन आयोग र जिल्ला प्रशासन कार्यालयले पत्रकारलाई सही र छिटो सूचना लिने पाउने व्यवस्था गरिदिनुपर्छ,” उनले भने। 

भक्तपुरका प्रमुख जिल्ला अधिकारी द्रोण पोखरेलले पत्रकारलाई सहजरुपमा सूचना संकलन गर्न सूचना अधिकृतको व्यवस्था गरिने बताए । 

पूर्वसभामुख एवं क्षेत्र नं २ का प्रतिनिधिसभातर्फ काँग्रेस उम्मेदवार दमननाथ ढुंगानाले प्रेस स्वतन्त्रता बलियो भए मात्र देशमा प्रजातन्त्र बलियो हुने बताए। 

एमाले नेता एवं क्षेत्र नं २ का प्रतिनिधिसभा सदस्य उम्मेदवार महेश बस्नेतले नेपालमा पूर्णरुपमा प्रेस स्वतन्त्रता कायम गर्दै यसलाई बलियो बनाउनु पर्नेमा जोड दिए । 

क्षेत्र नं २ बाट जनमोर्चा नेपालका उम्मेदवार शिवहरि खनाल र संघीय समाजवादी फोरम नेपालका उम्मेदवार कृष्णबहादुर घजुले मतदाता शिक्षालाई प्रभावकारी बनाउनुपर्ने बताए । 

नेपाल पत्रकार महासंघका पूर्व अध्यक्ष महेन्द्र विष्टले निर्वाचनको समयमा आम सञ्चारमाध्यम र सञ्चारकर्मीले पूर्णरुपमा निर्वाचन आचारसंहिता पालना गर्नुपर्नेमा जोड दिए। पत्रकार महासंघका उपाध्यक्ष दिलीप थापामगरले निर्वाचनमा सञ्चारकर्मीलाई छिटो र सहज सूचना पाउने व्यवस्था गरिदिँदा गलत सूचना प्रवाह नहुने बताए ।