बन्दको हल्ला निराधार : विष्ट

काठमाडौं । शुक्रबार नेपाल बन्द हुने हल्लाले त्रास फैलिएको बेला बन्दकर्ता भनिएकाहरुले बन्दको हल्ला निराधार भएको बताएका छन् ।

निर्वाचन आउनै लाग्दा बन्दको हल्ला फैलिएपछि बन्दकर्ता भनिएका संगठनहरुले बन्दको हल्ला भएको प्रष्ट पारेका छन् ।

बन्द गर्न भनेर हल्ला फैलिएको भए पनि कसले बन्द गर्ने भन्ने अहिलेसम्म जिम्मेवारी लिएका छैनन् । एकाथरीले नेत्र विक्रम चन्द ‘विप्लव’ नेतृत्वको नेकपाले मंसिर ८ मा नेपाल बन्द आह्वान गरेको भनिएको थियो । तर, नेकपाले आफुले बन्दको कुनै कार्यक्रम नराखेको प्रष्ट पारेको छ ।

विप्लवले बन्द गर्ने कायक्रम नहरेको जनाएपछि एकाथरीले पूर्व लडाकुहरुको संगठनले बन्द गर्न लागेको हल्ला चलेको थियो । तर, सो संगठनले पनि बन्दको कुनै कार्यक्रम नरहेको जनाएको छ ।

लेनिन विष्ट नेतृत्वको पूर्व माओवादी लडाकु समूहले पनि बन्द आह्वान नगरेको जनाएको छ । सो समूहका संयोजक विष्टले आफ्नो संगठनले निर्वाचनको बेला बन्द गर्ने कार्यक्रम नै नराखेको बताएका छन् । उनले भने, ‘हामीले बन्द आह्वान गरेका छैनौं, यो सबै निराधार हल्ला मात्र हो ।’