मलामीको  शव  फेला

पाल्पा । कालीगण्डकी नदीको राम्दीबाट हराएका युवाको शव सोमबार फेला परेको छ ।

बिहीबार राम्दी नदीमा नुहाउने क्रममा बेपत्ता भएका बगनासकाली गाउँपालिका – २ , पोखराथोकका २६ वर्षीय हरिबहादुर गाहाको शव रम्भा गाउँपालिकाको हुँगीस्थित असर्दीमा भेटिएको राम्दी प्रहरी चौकीले बताएको छ ।

बिहीबार हजुरआमाको दाहसंस्कार गरी नुहाउने क्रममा गाहा नदीमा बेपत्ता भएका थिए । राम्दी प्रहरी चौकी र स्थानीय बासिन्दाले नदी आसपासको क्षेत्रमा व्यापकरुपमा खोजी कार्य गरिरहे पनि फेला पार्न सकेको थिएन ।

मलामी गएका बेला राम्दीस्थित नदीमा बेपत्ता बनेका गाहाको मृत्युले गाउँ अझै शोकमा डुबेको छ ।नदी किनारामा कपडा र मोबाइल राखेर नुहाउन गएका उनी हराएपछि प्रहरीलाई मलामीले खबर गरेका थिए ।

कालीगण्डकी नदीमा नुहाउने क्रममा बगाएर ज्यान गुमाउनेको संख्या अझै रोकिएको छैन । दाहसंस्कार गर्ने उपयुक्त क्षेत्रको अभावमा नुहाउन गएकाहरु मृत्युको मुखमा पुग्न बाध्य छन् ।