अवैध लागुऔषधसहित तीन पक्राउ

ललितपुर । लागुऔषध बोकेर हिँडेको अवस्थामा प्रहरीले स्थानीय तिखिदेवलबाट ललितपुर महानगरपालिका – १४ बस्ने प्रवेश ढुंगाना र विक्रम खड्कालाई पक्राउ गरेको छ । 

लागुऔषधको कारोवार भइरहेको सूचनाका आधारमा कात्तिक १७ गते सिल्ड एण्ड सर्च अप्रेसनमा खटिएको प्रहरीले उक्त स्थानमा रहेको बा ३१ प ७९८७ नं. को मोटरसाइकल जाँच गर्दा कारोबारी पक्राउ परेको महानगरीय प्रहरी परिसरका प्रहरी नायब उपरीक्षक नरेन्द्र चन्दले बताए ।

अभियुक्तका बयानका आधारमा लागुऔषध वितरण गर्ने प्रभु शाह भनिने जमुना शाह तेलीको डेरा तलास गरी निजलाई समेत पक्राउ गरिएको छ । उनको डेराबाट थप लागुऔषध फेला परेको जनाइएको छ ।

पर्सा जिल्ला घर भएका हाल काठमाडाँ महानगरपालिका – २६ बस्ने शाहलाई पनि प्रहरीले नियन्त्रणमा लिएको छ ।