सकियो समानुपातिक मतपत्र छाप्ने काम

काठमाडौं । निर्वाचन आयोगले समानुपातिक तर्फको मतपत्रको छपाई सकेको छ । आयोगले समानुपातिक तर्फको मत पत्र छाप्ने काम सकेकाले प्रतिनिधि सभा र प्रदेश सभाको मत पत्र पनि छाप्न सुरु गर्ने भएको छ ।

सर्वाेच्च अदालतबाट भएको आदेशलाई सम्मान गर्दै निर्वाचन पूर्व निर्धारित कार्यक्रमअनुसार सुक्रबारदेखि नै प्रतिनिधिसभा र प्रदेशसभाको प्रत्यक्षतर्फको मतपत्रको छपाइ शुरु हुने प्रमुख निर्वाचन आयुक्त डा. यादवले बताए ।

आयोगले निर्धातिर समयमा मत पत्र छाप्न नसक्ने तर्क गर्दै सरकारले निर्वाचनको मिति सार्ने योजना बनाइरहेको थियो । तर, आयोगले निर्धाति मितिमै निर्वाचन गराउन आवश्यक पर्ने सबै मतपत्र छाप्न सकिने बताएको छ ।

प्रमुख निर्वाचन आयुक्त डा. यादवले पहिलो चरणको निर्वाचनको उम्मेदवारको मनोनयन र निर्वाचन चिन्ह प्रदान भई प्रचारप्रसारको काम शुरु भइसकेकोले बाँकी काम आयोगले पूरा गर्ने बताए ।

आगामी प्रतिनिधिसभा र प्रदेशसभा निर्वाचनको लागि आज आयोजित निर्वाचन र सुरक्षा विषयक दुई दिने प्रशिक्षक प्रशिक्षण कार्यक्रममा यादवले समानुपातिकतर्फको मतपत्र छाप्ने काम पूरा भएको जानकारी दिए । उनले निर्धातिर समयमा निर्वाचन सम्पन्न गर्न आयोगले आजैदेखि प्रतिनिधि सभा र प्रदेश सभाको मतपत्रको छपाई कार्य थाल्ने बताए ।

उनले दोस्रो चरणको लागि समेत निर्वाचन अधिकृतको कार्यालय खोलिसकिएको हुँदा विश्वासका साथ निर्वाचन सञ्चालन गर्न आयोग अघि बढेकाले अन्यौलको वातावरण नरहेको स्पष्ट पारे ।

व्यवस्थापकीय र प्राविधिक दृष्टीकोणबाट ज्यादै जटिल भए पनि राष्ट्रको आवश्यकता, राजनीतिक दलको सहमति र सरकारको आग्रहमा दुुवै निर्वाचन एकैसाथ गर्न आयोग तयार छ’ उनले भने, ‘निर्वाचनका बारेमा आलोचना, प्रतिआलोचना र अनुमानको कुरा आइरहेको छ, निर्वाचनको वातावरण अस्थिर तुल्याउने काम कही कतैबाट नहोस्, निर्धारित समयमै निर्वाचन गर्न हामी प्रतिबद्ध छौँ ।’