सामूहिक बलात्कारका अभियुक्तलाई सार्वजनिक

फरक फरक स्थानबाट पक्राउ परेका अभियुक्तलाई सार्वजनिक गर्न बुधबार जिल्ला प्रहरी कार्यालयले आयोजना गरेको पत्रकारसम्मेलनमा प्रहरी उपरीक्षक सहकुल थापाले बलात्कारका क्रममा अचेत भएकी ती महिलाको अचेत अवस्थामै मृत्यु भएको प्रारम्भिक अनुसन्धानबाट खुलेको बताए । 

'अझै विस्तृत अनुसन्धान जारी छ, यो घटनामा अझै केहीको संलग्नता भए उनीहरुलाई पनि ल्याउँछौँ' – प्रहरी उपरीक्षक थापाले भने । बनेपामा जडान गरिएको सिसी टिभी क्यामेरा फुटेजको सहयोगमा खोजी गरी प्रहरीले ती अभियुक्तलाई फरक फरक मितिमा फरक फरक स्थानबाट पक्राउ गरेको हो । पक्राउ परेका सबैले प्रहरीसामु आफूहरु बलात्कारमा संलग्न भएको बयान दिएका छन् । 

रिक्सा चलाउने र प्लम्बरको काम गर्ने भूम्लुटार गाउँपालिका–३ बस्ने ३२ वर्षीय राजु भन्ने गोपाल परियार, धुलिखेल नगरपालिका–७ बस्ने ३० वर्षीय हमाल भन्ने साधुराम विक, नमोबुद्ध नगरपालिका निवासी २७ वर्षीय ठूलोभाइ भन्ने महेश परियार, सिन्धुपाल्चोकको मेलम्ची–१४ बस्ने ३२ वर्षीय कुलबहादुर भन्ने सीताराम थापा, रामेछापको लखनपुर–१ बस्ने २४ वर्षीय प्रकाश परियार र सोही जिल्लाको नाग्रेगर्गचे–१ बस्ने सञ्जय भन्ने ३३ वर्षीय दिलबहादुर प्रधानलाई पक्राउ गरिएको जिल्ला प्रहरी कार्यालयले जनाएको छ । 

बनेपा नगरपालिका–८ स्थित इँट्टाभट्टा नजिकै एक साताअघि मकैबारीमा मृत अवस्थामा फेला परेकी बनेपा–१० बस्ने ५७ वर्षीय नानु आलेमगरमाथि सामूहिक बलात्कार भएको अनुसन्धानबाट खुलेको छ । ती महिलासँग अभियुक्तहरुको विगतमा पनि यौन सम्बन्ध रहेको बताइन्छ । 

प्रहरी उपरीक्षक थापाका अनुसार उनी विगतमा पनि मादकपदार्थ सेवन गरी घरमा नआउने गरेको कारण खोजीका लागि पीडित पक्षले उजुरी गरेको थिएन । अर्धनग्न अवस्थामा फेला परेको शव देखेर आफन्तले मृतकको पहिचान गरेका थिए । अभियुक्त सबैलाई कर्तव्य ज्यानसम्बन्धी मुद्दा चलाइने भएको छ । शव परीक्षणको प्रतिवेदन आउन बाँकी छ ।