धनकुटाको भेडेटार रवि राँके सडक खण्डको लुङ्फाजोङमा सुख्खा पहिरो जाँदा सडक अवरुद्ध

धनकुटा । धनकुटाको भेडेटार रवि राँके जोड्ने सडक खण्डमा सुख्खा पहिरो जाँदा सडक अवरुद्ध भएको छ ।

सो सडक खण्ड अन्तर्गत साँगुरगढी गाउँपालिका ५ डाँडाबजार छेउको लुङ्फाजोङ खण्डमा गएराती ८ बजे सुख्खा पहिरो झरेको छ । जसका कारण आज विहानदेखि नै सडक अवरुद्ध भएको छ ।

भेडेटारदेखि पाँचथरको रविसम्मको १०३ किमी लम्बाइको उक्त सडक फराकिलो बनाउँदा डाडा कटिङ गरेको स्थानमा सुख्खा पहिरो गएको हो । यो सडक खण्डमा दैनिक दर्जनौं सवारीसाधन सञ्चालन हुने गरेका छन् । तर, ठूलो सुख्खा पहिरो गएकाले पहिरो हटाउन नसक्दा आज बिहानदेखि नै सवारी आगमन ठप्प भएको प्रहरी चौकी डाडाबजारका बरिष्ठ हवल्दार नारायणबहादुर कट्वालले जानकारी दिए ।

धनकुटाको भेडेटारबाट पाँचथरको रवि हुँदै राँके जोड्ने एक सय किलोमिटर सडकले मोरङ र इलामलाई समेत समेट्छ । यो सडक खण्डमा धनकुटाको राजारानी, ६ नम्बर बुधबारे, कुरुलेतेनुपा, मौनाबुधुक, बोधे लगायत पाँचथरको रवि राँकेसम्म झण्डै २६ वटा ठूला बस चल्ने गरेका छन् भने ३० वटा पिकअप चल्ने गरेको छ । सबै सवारी साधनहरु वैकल्पिक मार्ग हुँदै गन्तव्यतर्फ गएका छन् ।

एक्जिम बैंक अफ इन्डियाको तीन अर्ब ६५ करोड रुयैयाँ लागतमा अहिले यो सडक स्तर उन्नति गर्ने काम भइरहेको छ । सो सडक खण्डमा माथिबाट सुख्खा पहिरो खसेपछि सडक निर्माण गरिरहेको भारतको एप्को इन्फाटेक कम्पनीको जेसीवीले बिहानैदेखि पहिरो पन्छाइरहेको छ । तर अहिले पनि सुख्खा पहिरो गइरहेकाले पहिरो पन्छाउन समस्या भएको र आज पहिरो पन्छाइसक्ने सम्भावना नरहेको साँगुरीगढी गाउँपालिका वडा नं. ५ का वडाध्यक्ष खड्ग लिम्बुले जानकारी दिए ।

एप्को इन्फाटेक निर्माण कम्पनीले २०७८ मंसिरसम्ममा दुवैतर्फ एक/एक मिटर नालीसहित सडक कालोपत्रे गरिसक्नेगरी २०७५ सालमै सम्झौता गरेको थियो । तर निर्माण कम्पनीले सडक निर्माणको काममा विलम्ब गर्दा पटकपटक सडक अवरुद्ध हुँदै आएको छ ।