मेरो बीमाको प्रधान कार्यालय गौशालामा उद्घाटन

नयाँ अवधारणा र रणनीतिका साथ स्थापित मेरो बीमाको प्रधान कार्यालयको उद्घाटन भएको छ । उक्त कम्पनी गत मंसिर ३ गते संस्थागत अभिकर्ताको काम सुरू गरेको थियो । कार्यालयको उद्घाटन बिमा विज्ञ तथा संस्थाका संस्थापक कोषराज सुवेदीले गरेका थिए । बीमा क्षेत्रमा सुवेदीको लामो अनुभव रहेको छ । गौशालाको पिङ्गलास्थानमा पशुपति भिजन नजिकैको घरमा भब्य कार्यालय उद्घाटन भएको हो ।

यस कम्पनीले “मेरो बीमा” नामक अनलाइन पोर्टल मार्फत अभिकर्ता तथा सेवाग्राही लाई सेवा सुविधा प्रदान गर्ने भएको छ।संस्थागत अभिकर्ताको लाइसेन्स लिनका लागि कुनै एक बीमा कम्पनीमा अभिकर्ताको लाइसेन्स लिनुपर्ने प्रावधान रहेको छ । नेपालमा बीमा कम्पनीहरू बीमा समितिबाट लाइसेन्स प्राप्त गरेर बीमा ऐन २०४९ र कम्पनी ऐन २०५८ अन्तर्गत स्थापना गरिनु पर्दछ ।

कम्पनीका सदस्य तथा सिईओ समेत रहेका शंकर बहादुर घिमिरेले उद्घाटनपछि कान्तिपथसँग भने, ‘हरेक व्यक्तिको जीवनको आर्थिक मूल्य हुन्छ । अर्थात् कुनै व्यक्तिले जुन किसिमले आम्दानी गरिरहेको हुन्छ । त्यो कमाइले उसको परिवारको पालनपोषण, शिक्षादीक्षा भइरहेको हुन्छ । आम्दानीबाट उसको समाजमा केही योगदान पनि भईरहेको हुन्छ । सरकारलाई उसले कर तिरेको हुन्छ । ऊ नहुँदा यो सबै कुरामा एउटा भ्याकुम सिर्जना हुन्छ । त्यो हुन नदिनलाई नै जीवन बीमा गर्नुपर्ने हुन्छ । बीमा दीर्घकालीन पुँजी निर्माणको एउटा सोपानक्रम हो ।’

जीवनको एक अनिवार्य हिस्सा झैं बनिसकेको बीमा गर्ने भन्दा नि बीमा बुझाउने आफुहरुको मुख्य नारा रहेको घिमिरेले बताए।