सेयर बजारमा हरियाली : एकै दिन २ अर्ब ७३ करोडको कारोबार

काठमाडौं । मौद्रिक नीतिपछिको पहिलो कारोबार दिन सेयर बजारमा हरियाली छाएको छ ।

आइतबार सेयरको बजारको परिसूचक नेप्से, सबै उपसमूहहरु र कारोबार रकम समेत उल्लेख्य बढेको छ । नेप्से परिसूचक ६१.०५ अंक बढेको छ । सो अंकको वृद्धिपछि २०७८ अंकमा कायम भएको छ ।

कुल २ अर्ब ७३ करोडको कारोबार भयो, यसअघि शुक्रबार १ अर्ब ४४ करोडको मात्रै कारोबार भएको थियो । सबै उपसमूहहरु बढेका छन् । बैंकिङ २२, विकास बैंक १७७, फाइनान्स ११७, होटल तथा पर्यटन ७४, जलविद्युत् ८४, जीवन बीमा २०७, उत्पादन १००, माइक्रोफाइनान्स १७५, निर्जीवन बीमा ११७, अन्य १०३ र व्यापार उपसमूह ८८ अंक बढे ।

आइतबार नेप्से ६१.०५ अंकले वृद्धि भएर २०७८.५१ अंकमा बन्द भएको छ। नेप्सेसँगै सबै उपसूचककमा हरीयाली हुँदा कारोबार रकम पनि बढेको छ । आइतबार वित्त कम्पनी उपसूचक सर्वाधिक ७.२२ प्रतिशतले वृद्धि हुँदा विकास बैंक उपसूचक ५.१० प्रतिशले बढेको छ । यस्तै हाइड्रोपावर, लघुवित्त अन्य र व्यापार क्षेत्रका कम्पनीको सेयरमूल्य तुलनात्मक रुपमा उच्च वृद्धि भएको छ ।

कारोबार रकमका आधारमा शिवम् सिमेन्ट, नेपाल पुनर्बीमा कम्पनी, हिमालयन डिस्टिलरी, एनआईसी एसिया बैंक र अरुणकाबेली पावर क्रमशः अगाडि रहे । नेप्सेसँगै कारोबार रकम पनि बढेर आइतबार बजारमा २ अर्ब ७३ करोड ९ लाखको कारोबार भएको छ । जसमध्ये शिवम् सिमेन्टको मात्रै ३९ करोड ७१ लाखको कारोबार हुँदा नेपाल पुनर्बिमा कम्पनीको ६ करोड ८३ लाखको कारोबार भएको छ ।

कारोबार अवधिभर १८० कम्पनीको सेयर कारोबार भएकोमा १७९ कम्पनीको सेयरमूल्य बढेको छ । एक कम्पनीको मात्रै सेयरमूल्यमा गिरावट भएको छ । युनिलिभर नेपालको सेयरमूल्य ०.३८ प्रतिशतले गिरावट हुँदा ३ वटा कम्पनीको सेयरमूल्य बढेर सकारात्मक सर्किट लेभलमा बन्द भएको छ । सेन्ट्रल फाइनान्स, समृद्धि फाइनान्स र मल्टिपर्पोस फाइनान्सको सेयरमूल्य बढेर सर्किट लेभलमा बन्द भएको हो ।

राष्ट्र बैंकले २५ लाखसम्मको मार्जिन प्रकृतिको सेयर धितो कर्जौमा जोखिम भार घटाउनुको साथै कर्जाको प्रति बैंक ४ करोडको सीमा हटाउँदा लगानीकर्ताले त्यसलाई सकारात्क रुपमा लिएका छन् । जसले सेयर बजारमा सकारात्मक प्रभाव परेको हो ।

मौद्रिक नीतिमार्फत राष्ट्र बैंकले मार्जिन प्रकृतिको सेयर धितो कजामा प्रतिव्यक्ति एक बैंकबाट अधिकतम ४ करोडको सिमा हटाएर प्रतिव्यक्ति १२ करोडको सीमा मात्रै कायम गर्ने बताएको छ । त्यस्तै २५ लाखसम्मको कर्जामा जोखिम भार १५० प्रतिशतबाट १०० प्रतिशत कायम गर्ने बताएको छ । उक्त नीतले राष्ट्र बैंक सेयर बजारप्रति सकारातमक छ भनने सन्देश भएकोले सेयर लगानीकर्ताको मनोविज्ञान पोजेटिभ भएको बजारका जानकारहरु बताउँछन् ।