स्याङ्जाको वालिङमा जीप दुर्घटना हुँदा ७ जनाको मृत्यु, ६ जना घाइते

स्याङ्जा । स्याङ्जाको वालिङ नगरपालिका १२ डाँडाखर्कस्थित आइतबार बिहान साढे १० बजे जीप दुर्घटना हुँदा ७ जनाको मृत्यु भएको छ । जीपमा सवार १३ मध्ये ६ जना घाइते भएको वडा प्रहरी कार्यालय वालिङका प्रहरी जवान गमबहादुर क्षेत्रीले जानकारी दिए ।

२ जनालाई उपचारका लागि पोखरा रिफर गरिएको छ भने थप ४ जनाको वालिङ प्राथमिक स्वास्थ्य चौकी, स्याङ्जामै उपचार भइरहेको छ ।

उनीहरूलाई पनि पोखरा रिफर गर्ने तयारी भइरहेको प्रहरी कार्यालय वालिङका प्रहरी जवान क्षेत्रीले जानकारी दिए । थप विवरण भने आउन बाँकी छ ।

ग १ ज ६३९९ नम्बरको जीप दुर्घटना भएको स्याङ्जा वडा प्रहरी कार्यालय वालिङका डीएसपी झकेन्द्र खतिवडाले जानकारी दिए । जीप सडकमा २ सय मिटर तल खसेको प्रहरीले जनाएको  छ ।