श्रीलंकामा सरकारविरोधी प्रदर्शन जारी, सरकार नछाड्ने राजपाक्षेको अडान कायमै

काठमाडौं । चरम आर्थिक संकट एवम् अत्यावश्यक सामग्रीको अभाव झेलिरहेको श्रीलंकामा राष्ट्रपति गोताबाया राजपाक्षेविरुद्ध जारी प्रदर्शन अझै रोकिएको छैन ।

दैनिक १२ घण्टासम्म विद्युत कटौती तथा खाद्यान्न, औषधि, इन्धनजस्ता अत्यावश्यक सामग्रीको अभाव र चर्को मूल्यवृद्धिको मारमा परेको श्रीलंकाका विपक्षी कार्यकर्ता मात्र नभई कानून व्यवसायी, चिकित्सक र नागरिक समाजका अगुवाहरूले राजधानी कोलम्बो, कण्डी नेगोम्बोजस्ता शहरमा केही सातायता प्रदर्शन जारी रहेको अन्तर्राष्ट्रिय सञ्चारमाध्यमले जनाएका छन् ।

उनीहरुको प्रदर्शन राष्ट्रपति राजपाक्षेतर्फ लक्षित रहेको जनाइएको छ । यद्यपि राजपाक्षेले भने व्यापक जनआक्रोश तथा हिंसात्मक प्रदर्शनका बावजुद सरकार छाड्न मानिरहेका छैनन् ।

सरकारको समर्थन गर्ने ४१ सांसद्ले सत्तारुढ गठबन्धन त्यागेसँगै सरकार अल्पमतमा परेपनि राष्ट्रपति राजपाक्षेका एकजना निकटस्थले राष्ट्रपतिले कुनै हालतमा पनि राजीनामा नदिने बताएका छन् ।

श्रीलंकाली संसद्मा सम्बोधन गर्दै सरकारका प्रमुख सचेतक जोन्स्टन फर्नाण्डोले राष्ट्रपतिले राजीनामा नदिने बताएका हुन् । सरकार विरोधी प्रदर्शन दिनप्रतिदिन हिंसात्मक बन्दै जाँदा त्यहाँ यसअघि सरकारका २६ मन्त्रीहरूले सामूहिक राजीनामा दिएका थिए ।

यससँगै राष्ट्रपति राजपाक्षेले संसद्मा सहभागी सबै दलहरुलाई सरकारमा आउन आग्रह गरेका थिए । यद्यपि उनको आग्रहलाई विपक्षीहरूले अस्वीकार गरेका छन् ।

यस्तै, श्रीलंकाका अर्थमन्त्रीले शपथ खाएको २४ घण्टा नबित्दै राजीनामा दिएका छन् । संकट गहिरिँदै जाँदा अहिले त्यहाँ कसैले पनि अर्थमन्त्रीको पद स्वीकार गर्न आनाकानी गरिरहेको बताइएको छ ।

यसअघि राष्ट्रपति राजपाक्षेका भतिज बसिल राजपाक्षेले २६ मन्त्रीहरुसँगै सामूहिक राजीनामा दिएका थिए । उनको स्थानमा आएका नयाँ अर्थमन्त्री अली सबरीले शपथ खाएको २४ घण्टा नबित्दै राजीनामा दिएका हुन् ।

उनको स्थानमा बण्डुला गुणवर्देनालाई नयाँ अर्थमन्त्रीका रुपमा सिफारिस गरिएको र यसबारे छलफल अघि बढाइएको श्रीलंकाबाट प्रकाशित हुने अंग्रेजी अखबार डेली मिररको अनलाइन संस्करणले जनाएको छ ।