२० वर्ष पछि सडक विस्तारको काम शुरु

दाङ । तुलसीपुर उपमहानगरपालिकाले २० वर्षसम्म विस्तार हुन नसकेका सडक विस्तार गर्न लागेको छ ।
विकट वडालाई सडक सञ्जालसँग जोड्ने योजनाअनुसार सडक सञ्जाल विस्तार भइरहेको नगर प्रमुख घनश्याम पाण्डेले जानकारी दिएका छन् । तुलसीपुर–१ को धनुवासमा पुगेको सडक विस्तार गरेर उपमहानगरपालिकाले सल्यानको मखनटाकुरीसम्म पु¥याउन लागेको हो ।
उनले सडक सञ्जाल नपुगेका विकट गाउँलाई उपमहानगरपालिकाले पहिलो प्राथमिकतामा राखेर काम गरिरहेको बताए । धनुवासदेखि सल्यानको मखनटाकुरी जोड्ने सडक सञ्जालको शनिबार शुरुआत गर्दै नगरप्रमुख पाण्डेले सडकलाई समृद्धिसँग जोड्न जनताले उद्यममा ध्यान दिनुपर्नेमा जोड दिए ।उपमहानगरपालिकाले धनुवास, रानी टाकुरा, गैरा सिउरे र मखन टाकुरा हुँदै सल्यान जोड्ने सडक निर्माणको काम शुरु गरेको छ । पाण्डेले विकट वडाका जनतालाई लक्षित गरेर तीन एम्बुलेन्स खरीद गरिएको बताउँदै केही दिनमै सञ्चालन गरिने बताए ।
सडकको ट्रयाक खोल्ने काम ४० दिनभित्र पूरा हुने उपभोक्ता समितिका अध्यक्ष ताराप्रसाद वलीले जानकारी दिएका हुन् । स्थानीयवासी डम्बर अर्यालले २० वर्षदेखिको सपना पूरा हुन लागेकोमा खुसी व्यक्त गरेका छन् ।