हात्तीको आक्रमणबाट उदयपुरमा एकजनाको मृत्यु

उदयपुर । जंगली हात्तीको आक्रमणबाट त्रियुगा नगरपालिका २ मा एक वृद्ध महिलाको ज्यान गएको छ ।

त्रियुगा नगरपालिका–२ लुहाको सामुदायिक वन क्षेत्रमा हात्तीको आक्रमणबाट त्रियुगा नगरपालिका–१२ की ६०–६५ वर्षीया सावित्रा राईको ज्यान गएको हो ।

आइतबार दिउँसो ३ बजे तिर घाँस काट्न जंगल गएकी राईलाई जंगली हात्तीले आक्रमण गरेको जिल्ला प्रहरी कार्यालय उदयपुरका प्रहरी निरीक्षक ललनप्रसाद कुर्मीले जानकारी दिए ।

मृतक राईको शव पोष्टमार्टमको लागि जिल्ला अस्पतालमा ल्याइएको छ । डिभिजन वन अधिकृत बिष्णु प्रसाद आचार्यका अनुसार मृतकका आफन्तलाई सरकारको तर्फबाट प्राप्त हुने क्षति तथा राहतको लागि आवश्यक सहयोगका लागि सिफारिस गर्ने बताए ।