ट्रकको ठक्करले एपीवानका क्यामरापर्सन पौडेलको मृत्यु

चितवन । चितवनको रत्ननगरमा ट्रकको ठक्करबाट पत्रकारको मृत्यु भएको छ ।

एपीवान टेलिभिजनमा कार्यरत प्रविन पौडेललाई रत्ननगर १, निपनीमा ट्रकले ठक्कर दिएको थियो । नारायणगढबाट टाँडीतर्फ आँउदै गरेको ना २ ख २१६६ नंको ट्रकले सोही दिशाबाट टाँडी आँउदै गरेका पौडेल सवार बा ६१ प ९२१ नं को स्कुटरलाई ठक्कर दिएको थियो ।

ट्रकको ठक्करबाट घाइते भएका पौडेललाई उपचारका लागि अस्पताल लैजादै गर्दा मृत्यु भएको नेपाल पत्रकार महासंघकी केन्द्रिय सचिव लक्ष्मी पुनले बताइन् ।

बाग्लुङ घर भएका २६ वर्षीय पौडेल भरतपुर ९ मा डेरा गरि बस्दै आएका थिए । पौडेल एपीवान एचडी टेलिभिजनका क्यामरापर्सन थिए ।
ठक्कर दिने ट्रक र चालक ईलाका प्रहरी कार्यालय टाँडीको नियन्त्रणमा छन् ।