पत्रकार जगत विवादित बन्दै गईरहेको गुनासो पत्रकारहरुले नै गरे

विराटनगर। सञ्चारकर्मीहरुले आग्रह पूर्वाग्रहमा रहेर समाचार लेख्ने गरेका कारण समस्त पत्रकार जगत विवादित बन्दै गईरहेको स्वयं पत्रकारहरुले नै गुनासो गरेका छन् ।

विराटनगरमा आयोजित नेपाल पत्रकार महासंघ प्रदेशका अध्यक्ष महासचिव र शाखा अध्यक्षहरुको राष्ट्रिय सम्मेलनमा सहभागी पत्रकारहरुले सञ्चारकर्मीहरु निष्पक्ष र स्वतन्त्र मात्र नभइ पेशागत मर्यादा भित्र रहनुपर्ने धारणा व्यक्त गरेका छन् ।

उनीहरुले पत्रकारहरुको क्रियाकलापका कारण पनि सरकार प्रेस मैत्री नबनेको र प्रेस तथा अभिव्यक्ति स्वतन्त्रता संकुचित गर्न लागिपरेको धारणा व्यक्त गरेका थिए ।

सम्मेलनको उद्घाटन गर्दै एक नम्बर प्रदेशका मुख्यमन्त्री शेरधन राईले अहिले मुलुकमा राजनीतिक स्थिरता रहेको र मुलुक आर्थिक समृद्धि तथा विकास तर्फ लम्बिरहेको बेला केही मिडियाले मिसन बनाएर यसलाई खल्बल्याउने प्रयास गरिरहेको गुनासो गरे । उनले मुलुकमा राजनीतिक स्थिरता भए मात्र पत्रकारिता क्षेत्रको विकास सम्भव भएको धारणा व्यक्त गरे ।

नेपाल पत्रकार महासंघले आयोजना गरेको यस राष्ट्रिय सम्मेलनमा सातै प्रदेशका अध्यक्ष र महासचिव तथा विभिन्न शाखा, एसोशिएट र प्रतिष्ठान शाखाका अध्यक्षहरुको सहभागिता रहेको छ । यस सम्मेलनले पत्रकार महासंघको भावी कार्यदिशा र रणनीति बनाउने कार्यक्रम रहेको छ ।