चितवनमा ट्रकको ठक्करले पैदलयात्रीको मृत्यु

चितवन । सोमबार बिहानै चितवनमा ट्रकको ठक्करले पैदल यात्रुको मृत्यु भएको छ ।

नारायणगढ–मुग्लिन सडकखण्डको भतेरीमा काठमाडौँबाट भारतको चेन्नाइतर्फ जाँदै गरेको पिएन८८ए २३१६ नम्बरको ट्रकले ठक्कर दिँदा ३० वर्षीय पुरुषको मृत्यु भएको छ । मृतकको सनाखत हुनसकेको छैन ।

जिल्ला प्रहरी कार्यालय चितवनका अनुसार सो ट्रकलाई पछाडिबाट आउँदै गरेको ना४ख २७२९ नम्बरको ट्रकले ठक्कर दिएपछि अनियन्त्रित भई पैदलयात्रीलाई ठक्कर दिएको थियो । दुवै ट्रक र चालकलाई प्रहरीले नियन्त्रणमा लिएको छ ।