पर्साको सेलरमिलमा आगलागी

पर्सा । सखुवाप्रसौनि गाउँपालिकामा रहेको सेलरमिलमा आगलागी हुँदा ९ लाखभन्दा बढीको धनमाल जलेर नष्ट भएको छ ।

गाउँपालिकाकोे वडा नं।४ सोलखपुरमा रहेको ग्यासु दिन मियाँको धान कुट्ने सेलरमिलामा शनिबार आगलागी भएको हो । बिजुलीको तार सट भई बिहान २ बजेदेखि आगलागीे भएको प्रहरी चौकी महुवनले जनाएको छ ।

सेलरमिलमा भएको आगलागीलाई सशस्त्र प्रहरी, नेपाल प्रहरी र स्थानीय बासिन्दाको सहयोगमा नियन्त्रणमा ल्याइएको प्रहरी चौकी महुवनका इन्चार्ज प्रहरी सहायक निरीक्षक जिवछकुमार शर्माले जानकारी दिए ।

उनले आगलागीमा परी मिलभित्र भण्डारण गरी राखिएको धान, ब्राण्ड, सेलरमेशिन, दमकल, मोटर र ७० हजार नगद जलेर नष्ट भएको बताए । आगलागीमा परी ९ लाखभन्दा बढीको धनमाल जलेको हुन सक्ने प्रहरीको भनाई छ ।