दमकमा भारतीय ट्रकको ठक्करबाट बाबु-छोराको ज्यान गयो

झापा । भारतीय मालबाहक ट्रकले मोटरसाइकललाई ठक्कर दिँदा बाबु-छोराको मृत्यु भएको छ ।

झापाको दमक चोकमा मंगलबार दिउँसो एचआर २७ जे ०६२५ नम्बरको मालबाहक भारतीय ट्रकले मोटरसाइकललाई ठक्कर दिँदा बाबु र छोराको मृत्यु भएको हो ।

मोटरसाइकलमा सवार रहेका मोरङ पथरीशनिश्चरे नगरपालिका-९ का ६३ वर्षीय धनप्रसाद गिरी र उनका २९ वर्षीय छोरा हेमचन्द्रको मृत्यु भएको प्रहरी निरीक्षक खगेन्द्र एकतेनले जानकारी दिए । उनका अनुसार ठक्करबाट गम्भीर घाइते दुवैको स्थानीय लाइफलाइन अस्पतालमा उपचारका क्रममा मृत्यु भएको हो ।

दमकको पश्चिम बस रोक्ने ठाउँमा को ३३ प ७९४५ नम्बरको मोटरसाइकललाई सो ट्रकले ठक्कर दिएको थियो । प्रहरीले दुर्घटनामा संलग्न ट्रक र चालकलाई नियन्त्रणमा लिएको जनाएको छ ।