धनकुटा सदरमुकाम नजिक लागेको डढेलो राती अबेर आयो नियन्त्रणमा

धनकुटा । धनकुटा नगरपालिका वडा नं. ५ र ७ को सामुदायीक वनमा भीषण आगलागी राती अबेर नियन्त्रणमा आएको छ । हिजो दिउँसोदेखि धनकुटा नगरपालिका वडा नं. ५ को बडहरे सामुदायीक वन र वडा नं. ७ को घिल्पे सामुदायीक वनमा भीषण लागलागी भएको थियो छ ।

बडहरे सामुदायीक वनमा लागेको आगो बस्ती नजिक पुगेको थियो । तर, नेपाली सेना, सशसत्र प्रहरी, नेपाल प्रहरी र स्थानीयले प्रयासको प्रयासले राती अबेर आगलागी नियन्त्रणमा आएको थियो । यद्यपी तल्लो क्षेत्रमा भने अझैं आगलागी भइरहेको सामुदायीक वन उपभोक्ता महासंघ धनकुटाका अध्यक्ष निलबहादुर थापाले जानकारी दिए ।

खडेरी लागेसँगै धनकुटाका सामुदायीक वनहरुमा आगलागी भइरहेका छन् । हिउँदको समयमा आगलागी हुन नदिन डिभिजन वन कार्यालय, सामुदायीक वन उपभोक्ता महासंघ, स्थानीय सामुदायी वनहरु र अन्य सरोकारवालाहरुले सचेतना फैल्याउने अभियान सञ्चालन गरे पनि धनकुटाका सामुदायीक वनहरु आगलागीका घटनामा कमी आएको छैन ।

यता, साँगुरीगढी गाउँपालिका वडा नं. ३ को साफालाङ सामुदायीक वनमा लागेको डडेलो पनि नियन्त्रणमा आएको छ । हिजो दिउँसो १२ बजेतिर आगो लागेको भए पनि स्थानीयले ३ बजेतिर मात्रै वनमा आगलागी भएको थाहा पाएपछि स्थानीय भेला भएर डडेलो नियन्त्रणमा लिएका थिए ।
आगलागी भएपछि स्थानीय भेला भएर डेढ घण्टामै नियन्त्रणमा लिइएको नेपाल रेडक्रस सोसाइटी साँगुरीगढी ३ खुवाफोकका सभापति मइनराज राईले जानकारी दिए ।