मृतकको सम्झनामा विद्यालयमा लगाइयो रुद्री पाठ

धनकुटा । धनकुटा नगरपालिका -१० उत्तरपानीमा रहेको श्री आधारभुत बिद्यालयले बौद्धिक अपाङ्गता स्रोत कक्षामा तथा विद्यालयमा बिगतमा दिवङ्गत भएका बालबालिकाहरुको स्मृतिमा एक दिने रुद्री पाठ पारायण, सत्यनारायण पुजासहित होम होमादी गरिएको छ ।

सो अवसरमा सो विद्यालयमा अध्ययनरत विद्यार्थी र उनीहरुका दिवंगत परिवारजनको विभिन्न समयमा भएको निधनमा शोक व्यक्त गर्दै बैकुण्ठबासको कामनासहित विद्यालयमा रुद्री पाठ पारायण, सत्यनारायण पुजासहित होम होमादी गरिएको छ ।

सो अवसरमा धनकुटा नगरपालिका -१० का वडाध्यक्ष नगेन्द्र पाण्डे, विद्यालय व्यवस्थापन समितिका अध्यक्ष तेजबहादुर कार्की, स्रोत शिक्षक कमला दाहाल लगायत झण्डै २ सय जनाको उपस्थिती रहेको थियो ।

उत्तरपानीमा२०५६ सालदेखि श्री आधारभुत बिद्यालयमा स्रोत कक्षा सञ्चालन हुँदै आएको छ । अहिले ६ वर्षदेखि २० वर्षसम्मका ३५ जना सीप विकास प्रवद्र्धनका लागि आवासीय रुपमा बसोवास गर्दै आएका छन् । १० जना चाँही साधारणतर्फ पढिरहेका छन् । विद्यालय तर्फभने ७५ जना विद्यार्थी छन् । यहाँ नर्सरीदेखि कक्षा ८ सम्म पढाई हुँदै आएको छ ।

हालसम्म स्थानीय सरकारले न्युन मात्रै सहयोग गरेको विद्यालयमा प्रधानाध्यापक विनोद प्रसाद सुवेदीले बताए । तर सथानीय सरकारको न्युन सहयोग भए पनि सामाजिक विकास मन्त्रलाय कोशी प्रदेश सरकार र संघीय सरकारले भने सहयोग गर्दै आउने गरेको उनको भनाई छ ।

त्यसका अलावा विभिन्न व्यक्तिहरुले जन्म दिन, संघ संस्थाहरुको स्थापना दिवस, विवाह उत्सव आदीका समयमा सहयोग गर्ने गरेका छन् भने रिलाइवर लाइफ इन्स्योरेन्सले तातोपानी वाटर प्लान, सोलार, फर्निचर, लगायतका सामाग्री दिएको छ ।