धनकुटा सदरमुकाम नजिकैको वनमा भीषण आगलागी, धनकुटा बजार नजिकका वस्ती जोखिममा

धनकुटा । धनकुटा नगरपालिका वडा नं. ५ र ७ को सामुदायीक वनमा भीषण आगलागी भएको छ । आज दिउँसोदेखि धनकुटा नगरपालिका वडा नं. ५ को बडहरे सामुदायीक वन र वडा नं. ७ को घेल्पे पाडवा सामुदायिक वनमा भीषण लागलागी भइरहेको छ ।

अहिले सो वनमा लागेको आगो नियन्त्रणका लागि नेपाली सेना, सशसत्र प्रहरी, नेपाल प्रहरी र स्थानीय खटिएका छन् । तर, नियन्त्रण हुन सकिरहेको छैन । बडहरे सामुदायीक वनमा लागेको आगो बस्ती नजिक पुगेको छ । दुबै वनमा लागेको आगो बस्ती नजिक पुगेका कारण सतर्कता अपनाउन विभिन्न निकायहरुले अपिल गरिरहेका छन् ।

खडेरी लागेसँगै धनकुटाका सामुदायीक वनहरुमा आगलागी भइरहेका छन् । हिउँदको समयमा आगलागी हुन नदिन डिभिजन वन कार्यालय, सामुदायीक वन उपभोक्ता महासंघ, स्थानीय सामुदायी वनहरु र अन्य सरोकारवालाहरुले सचेतना फैल्याउने अभियान सञ्चालन गरे पनि धनकुटाका सामुदायीक वनहरु आगलागीका घटनामा कमी आएको छैन ।

यतिबेला महालक्ष्मी नगरपालिका वडा नं. ७ अर्खौले सामुदायीक वन उपभोक्ता समिति र सागुरीगढी गाउँपालिका १ को बिलेनिपाखा सामुदायिक वनमा पनि भीषण आगलागी भइरहेको छ । यी वनहरुमा लागेको आगलागी नियन्त्रणको प्रयास भइरहे पनि नियन्त्रण बाहिर रहेको बताइएको छ । 

साफालाङ सामुदायीक वनको डढेलो नियन्त्रणमा
साँगुरीगढी गाउँपालिका वडा नं. ३ को साफालाङ सामुदायीक वनमा लागेको डडेलो पनि नियन्त्रणमा आएको छ । आज दिउँसो १२ बजेतिर आगो लागेको भए पनि स्थानीयले ३ बजेतिर मात्रै वनमा आगलागी भएको थाहा पाएपछि स्थानीय भेला भएर डडेलो नियन्त्रणमा लिएका थिए ।

आगलागी भएपछि स्थानीय भेला भएर डेढ घण्टामै नियन्त्रणमा लिइएको नेपाल रेडक्रस सोसाइटी साँगुरीगढी ३ खुवाफोकका सभापति मइनराज राईले जानकारी दिए । स्थानीयले थप आगलागी नहोस् भनेर अग्नी रेखाहरु पनि बनाएका छन् । सो वनमा बाँस, उत्तिस, खयर, सिरिस लगायतका बोटविरुवाहरु छन्।