राजावादीको आन्दोलन : तीनकुने क्षेत्रको कर्फ्यु १० घण्टा लम्बियो

काठमाडौं । आज काठमाडौंमा दिनभर तनावैतनाव भएको छ । काठमाडौंमा बढ्दो अशान्ति र हिंसात्मक घटनाका कारण सुरक्षास्थिति थप कडा पारिएको छ । जडिबुटीस्थित जडीबुटी उत्पादन तथा प्रशोधन केन्द्रमा आगजनी भएको छ भने धेरै सवारीसाधन क्षतिग्रस्त भएका छन् ।

काठमाडौँको तीनकुनेमा लगाइएको कर्फ्यु थप १० घण्टा लम्बिएको छ । काठमाडौँका प्रमुख जिल्ला अधिकारी ऋषिराम तिवारीले शनिबार बिहान ७ बजेसम्म लागू हुने गरी दोस्रो आदेश जारी गरेका छन् ।

यसअघि उनले राजावादी प्रदर्शनकारी उग्र भएर व्यक्तिको घर तोडफोड तथा आगजनीमा उत्रिएपछि सम्भावित दुर्घटनालाई टार्न शुक्रबार अपरान्हदेखि राति १० बजेसम्मका लागि कर्फ्यु आदेश जारी गरेका थिए । गौशालादेखि शान्तिनगर पुल हुँदै जडिबुटी र मनोहरा खोला पुलसम्म कर्फ्यु आदेश गरिएको प्रजिअ तिवारीको आदेशमा उल्लेख छ ।

सो क्षेत्रभित्र भेला, जुलुस, प्रदर्शन, घेराउजस्ता गतिविधि गर्न निषेध गरिएको छ । ध्वंसात्मक गतिविधि बढेपछि सेनाको गस्ती पनि बढाइएको छ ।

प्रजिअको आदेशमा लेखिएको छ, ‘अवस्थाको विश्लेषण गर्दै यसअघि जारी भएको कर्फ्यु आदेशको निरन्तरतास्वरूप मिति २०८१र१२र१५ गते रातिको १० बजेदेखि मिति २०८१र१२र१६ गते बिहान ७ बजेसम्मका लागि स्थानीय प्रशासन ऐन, २०२८ को दफा ६क बमोजिम काठमाडौँ जिल्लाको काठमाडौँ महानगरपालिकाभित्र देहायका चार किल्ला तोकी सो सिमानाभित्र कसैले आवतजावत गर्न, कुनै पनि प्रकारको भेला, जुलुस, प्रदर्शन, सभा, बैठक, घेराउ गर्न नपाउने गरी कर्फ्यु आदेश जारी गरिएको छ ।’

चार किल्लामा बानेश्वरदेखि तीनकुने क्षेत्रका गौशाला, एयरपोर्ट, गैरीगाउँ, तीनकुने हुँदै कोटेश्वर, कोटेश्वरदेखि जडिबुटी पुल, कोटेश्वरबाट बालकुमारी पुलसम्म, बानेश्वर चोकदेखि शंखमूल पुलसम्म, गौशाला चोकदेखि पुरानो बानेश्वर हुँदै नयाँबानेश्वर चोकसम्म तोकिएको छ ।

राजावादी आन्दोलनकारीहरुले काठमाडौँको आलोकनगरस्थित नेकपा (एकीकृत समाजवादी) को पार्टी केन्द्रीय कार्यालयमा प्रदर्शनकारीले आगजनी गरेको छ । पूर्वराजाका समर्थकहरूले एकीकृत समाजवादी पार्टी कार्यालय तोडफोड गर्नुका साथै आगनजी गरेका हुन् ।

यसअघि समर्थक प्रदर्शनकारीहरूले तीनकुनेस्थित एक घरमा आगजनी गरेका थिए भने पेरिसडाँडा नजिक एक सरकारी गाडीमा समेत तोडफोड र आगजनी गरेका थिए । गृह मन्त्रालयले राजावादी समूहको आन्दोलन यो हदसम्म जाने अनुमान नगरिएको जनाएको छ । मन्त्रालयमा शुक्रबार साँझ आयोजित पत्रकार सम्मेलनमा सहसचिव छविराज रिजालले एउटा राजनीतिक पार्टी संलग्न भएकोले यस्तो हदसम्म आन्दोजन जाने अनुमान नगरिएको बताएका हुन् ।