नेपाल प्रहरीका सई ३० हजार घुससहित पक्राउ, प्रहरी संगठनमा पारदर्शिता र सुशासनमाथि प्रश्न

काठमाडौं । सेवाग्राहीसँग घुस लिएको आरोपमा नेपाल प्रहरीका नायब निरीक्षक (सई) खिम बहादुर खड्का पक्राउ परेका छन् ।

खड्कालाई अख्तियार दुरुपयोग अनुसन्धान आयोग, बुटवलको टोलीले अवैध रूपमा सामान आयात गर्न सहजीकरण गर्ने नाममा घुस लिएको अवस्थामा नियन्त्रणमा लिएको हो ।

दुर्गौलिया नाका अन्तर्गत प्रहरी चौकी हाटी बनगाई दुर्गौलियामा कार्यरत खड्काले भारतबाट भन्सार छली गरेर सामान ल्याउन मद्दत गर्ने भन्दै सेवाग्राहीसँग घुस मागेको आरोप लागेको छ ।

अख्तियारको टोलीले मायादेवी गाउँपालिका–६ मा रहेको स्थानबाट उनलाई नियन्त्रणमा लिएको अख्तियारका प्रवक्ता राजेन्द्र कुमार पौडेलले जानकारी दिए । पौडेलका अनुसार सई खड्का ३० हजार रुपैयाँ घुस लिइसकेको अवस्थामा पक्राउ परेका हुन् ।

हाल उनीमाथि थप अनुसन्धान भइरहेको छ।

प्रहरी संगठनमा पारदर्शिता र सुशासनमाथि प्रश्न

नेपाल प्रहरीले समाजमा शान्ति र कानुनी शासन कायम गर्ने जिम्मेवारी बोकेको छ। तर, प्रहरी संगठनभित्रै घुसखोरी र अनियमितता बढ्दै जानु गम्भीर चिन्ताको विषय हो ।

सुरक्षाकर्मीहरूमाथि जनताको विश्वास मजबुत बनाउन सम्बन्धित निकायले कठोर कारबाही र सुधारका उपायहरू अवलम्बन गर्नुपर्ने देखिन्छ ।यस घटनाले पुनः प्रहरी संगठनभित्र सुधार आवश्यक रहेको संकेत दिएको छ ।