धनकुटाको सहिदभुमी - ७ साल्बोटे र पाखाटोलबाट सिमेन्ट उद्योगले ढुंगा ओसार्दा स्थानीयले सास्ती खेप्दै

धनकुटा । धनकुटाको सहिदभुमी गाउँपालिका वडा नं. ७ साल्बोटे र पाखाटोलबाट सिमेन्ट उद्योगले ढुंगा ओसार्दा स्थानीयले सास्ती खेपिरहेका छन् ।

सहिदभुमी गाउँपालिका वडा नं. ७ बाट दन्तकाली क्वेरिज मुख्य कार्यालयमार्फत शिवम्, सौर्य र रिद्धि सिमेन्ट उद्योगले ढुंगा लैजाने गरेको छ । सो सिमेन्ट उद्योगले सहिदभुमी गाउँपालिका वडा नं. ७ र धनकुटा नगरपालिका वडा नं. ९ को तमोर किनारै किनारमा रहेको सडकबाट ढुंगा लैजाने गरेको छ ।

सिमेन्ट बनाउने ढुंगा लैजादा टिफरले बाटो बिगार्ने र धुलैधुलो बनाउने गरेको भन्दै स्थानीय आक्रोसित बनेका छन् । उनीहरुले सो सिमेन्ट उद्योगका कारण तमोर किनार आसपास बस्ने मानिसहरु विस्थापित हुनुपर्ने अवस्था आएको भन्दै धनकुटाका प्रमुख जिल्ला अधिकारी टुवराज पोख्रेलको ध्यानाकर्षण गराएका छन् ।

स्थानीयले सम्बन्धित क्षेत्रको बाटोमा पैदल यात्रीमा समस्या परेको हुनाले यसतर्फ पनि ध्यान दिनुपर्ने, बाटोको दीर्घकालीन समस्या समाधानका लागि बाटो कालोपत्रे गर्नुपर्ने, खानी संचालन तथा टिफर आवातजावत गर्दा धुलो नउड्ने वातावरण बनाउनुपर्ने माग अघि सारेका छन् ।

स्थानीयले प्रमुख जिल्ला अधिकारी पोख्रेललाई बुझाएको ध्यानकर्षण पत्रमा बर्खाको समयमा बाटो बिगारेर छाड्दा यस क्षेत्रको कृषि उत्पादन ढुवानीमा समस्या पर्ने भएकोले १२ महिना नै बाटोको मर्मतसम्भार हुनुपर्ने, धुलो धुवाँका कारण सो क्षेत्रका विद्यालय तथा विद्यार्थीहरुमा पठनपाठनमा समस्या भएको कारण विद्यालय समयमा टिफर संचालन गर्न नहुने, सम्भावित दुर्घटना न्यूनिकरणका लागि ढुवानी साधनको गति सिमितता हुनुपर्ने र सिमेन्ट खानीले बैकल्पिक मार्गको विकल्प खोज्नुपर्ने माग राखेका छन् ।

यदी सम्बन्धित पक्षले धुलो तथा धुवाँ न्युनिकरणका उपायहरु ३ दिन भित्रमा अवलम्बन नगरे वा मागहरु अब पनि वेवास्ता गरे स्थानीयबासीहरुले टिफर आवातजावतमा अवरोध गर्ने चेतावनी पनि दिएका छन् ।

स्थानीय सरोकार समिति तथा स्थानीयवासीहरुका तर्फबाट बुझाएइको ध्यानाकर्ष पत्र दन्तकाली क्वेरिज मुख्य कार्यालय, प्रतिनिधिसभा सदस्य राजेन्द्रकुमार राई, प्रदेशसभा सदस्य निरन राई, जिल्ला समन्वय समिति, धनकुटा नगरपालिका, सहिदभूमि गाउँपालिका, जिल्ला प्रहरी कार्यालय, धनकुटालाई बोद्धार्थ दिइएको छ ।

यता, दन्तकाली क्वेरिज मुख्य कार्यालयका सिनियर कर्मचारी रामजी प्रसाद चौरासियाले अहिले २ वटा ट्यांकरबाट सडकमा पानी हाल्ने काम गरे पनि खडेरी र हावापानीका कारण धुलो नियन्त्रण गर्न समस्या भएको बताउनु भएको छ । चौरसियाले केही दिनभित्रै अर्काे ठूलो ट्यांकर ल्याएर पानी हालिने जारकारी दिए ।

दन्तकाली क्वेरिज मुख्य कार्यालयले साल्बोटे र पाखा टोलमा २५ हेक्टर क्षेत्रफलमा सिमेन्ट बनाउने ढुंगा निकाली रहेको छ । अहिले दैनिक ४० वटासम्म टिफरले ढुंगा लैजाने गरेको छ ।