निर्वाचनमार्फत महाधिवेशन सम्पन्न गराउन भन्दै चौतारीमा हस्ताक्षर अभियात सुरु

विराटनगर । नेकपा एमालेनिकट पत्रकारहरुको पेशागत संगठन प्रेस चौतारी नेपालको जारी १०औं महाधिवेशन लोकतान्त्रिक पद्धतिअन्तर्गत निर्वाचनमार्फत सम्पन्न गराउन भन्दै हस्ताक्षर अभियात सुरु भएको छ । प्रेस चौतारी नेपालको केन्द्रीय महाधिवेशन आइतबारदेखि विराटनगरमा जारी छ ।

अधिवेशन अन्तर्गत गएराति भएको बन्द सत्रले प्रेस चौतारीको आर्थिक तथा सांगठानिक प्रतिवेदन पारित गरेको छ । योसँगै आजदेखि निर्वाचन प्रक्रिया अघि बढ्दै छ ।

केही दिनअघि नै प्रधानमन्त्रीसमेत रहेका नेकपा एमालेका अध्यक्ष केपी शर्मा ओलीले चौतारीको अध्यक्ष गणेश पाण्डे र महासचिव चेतन अधिकारीलाई बनाउन निर्देशन दिएको विषय बाहिर आएपछि कार्यकर्तामा असन्तुष्टि देखिएको हो । महाधिवेशमा निहीत नेतृत्व छान्ने अधिकारलाई पार्टी अध्यक्षले नै केन्द्रबाट हस्तक्षेप गरेको भन्दै भन्दै प्रतिनिधिहरु असन्तुष्ट देखिन्छन् ।

प्रेस चौतारीको अध्यक्षमा गणेश पाण्डे र राजेश राई आकाङ्क्षी छन् । दुईमध्ये पाण्डेलाई अध्यक्ष बनाउन ओलीको निर्देशन छ । प्रतिनिधिहरूले महाधिवेशनलाई स्वतन्त्र छाडेर निर्वाचन प्रक्रियाबाट नयाँ नेतृत्व छान्ने वातावरण बनाउन हस्ताक्षर अभियानसमेत चलाइरहेका छन् ।

यसअघि नेकपा एमालेको प्रचार तथा प्रकाशन विभाग प्रमुख राजेन्द्र गौतमले चुनाव गर्न नसकिने खालको अभिव्यक्ति दिएका थिए । उनले भनेका थिए, ‘अहिले यही महाधिवेशन स्थलमा केही साथीहरू एक बित्ता उफ्रिएर पैरवी गरेर नेतृत्वमा पुगिन्छ भन्ने होला । प्रेस चौतारीको नेतृत्व चयनमा पार्टीसमेत इन्भल्भ हुन्छ, यो पत्रकार महासंघको चुनाव होइन ।’

उद्घाटनदेखि नै प्रेस चौतारीको नेतृत्व चयनको विषयलाई लिएर विभिन्न टीकाटिप्पणी हुँदै आएको छ । निर्वाचनमा जान दिनु पर्ने माग प्रेस चौतारीका सदस्यको छ ।