ओलीले आज सबै पालिकाका अध्यक्षलाई भर्चुअल सम्बोधन गर्ने

काठमाडौ । नेकपा एमालेका अध्यक्ष केपी शर्मा ओलीले आज स्थानीय तहको निर्वाचनको तयारीका क्रममा सबै पालिकाका अध्यक्षहरूसँग अन्तरक्रिया गर्दैछन् ।

ओलीले होटल हिमालयन ललितपुरबाट आज दिउँसो १ बजेदेखि करिब ३ घण्टा स्थानीय निर्वाचनको पालिका स्तरको तयारी, घोषणा पत्रमा समेट्नु पर्ने विषयवस्तु आदिका बारेमा पालिका अध्यक्षहरूको सुझाव लिने छन् ।

भर्चुअल बैठकमा स्थायी कमिटी सदस्य, घोषणा पत्र तयारी समितिका सदस्य, पार्टीका जिल्ला अध्यक्ष र प्रदेश कमिटीका पदाधिकारी समेत सहभागी हुने स्थानीय तह विभाग प्रमुख देवेन्द्र दाहालले जानकारी दिए ।

भर्चुअल बैठकमा समितिले तयार गरेको घोषणा पत्रको अवधारणा पूर्व अर्थमन्त्री युवराज खतिवडा र पुनर्निर्माण प्राधिकरणका पूर्व कार्यकारी निर्देशक सुशील ज्ञवालीले प्रस्तुत गर्ने छन् ।