हात्तीको आक्रमणबाट दमकमा एकजनाको मृत्यु

झापा । जंगली हात्तीको आक्रमणबाट दमक नगरपालिका-३ गोलाटारका ६३ वर्षीय गणेशप्रसाद अधिकारीको मृत्यु भएको छ।

जिल्ला प्रहरी कार्यालय झापाका डिएसपी वसन्त पाठकका अनुसार मंगलबार राति ८ बजे घर नजिकैको मकैमा पानी लगाउन गएका बेला अधिकारीलाई हात्तीले आक्रमण गरेको पाठकले बताए । उनको घटनास्थलमै मृत्यु भएको हो ।

आक्रमण गर्ने हात्ती हुम्सेदुम्से सामुदायिक वनबाट निस्किएको प्रहरीले बताएको छ। उक्त क्षेत्र हात्ती प्रभावित क्षेत्र पनि हो। यहाँ हात्ती दिनहुँ जसो गाउँमा निस्किने गरेको स्थानीयबासी बताउँछन् ।