नोबेल मेडिकल कलेजमा विद्यार्थीले गरे तोडफोड, केही विद्यार्थी घाइते   

काठमाडौँ । थोरै विद्यार्थीलाई मात्रै लिएर कक्षा सुरू भएपछि विराटनगरको नोबेल मेडिकल कलेजमा तनाव सिर्जना भएको छ ।

अतिरिक्त शुल्क नबुझाउने विद्यार्थीलाई प्रवेश नदिई  थोरै विद्यार्थी राखेर कक्षा सञ्चालन गरेको भन्दै आज नोबेल कलेजका विद्यार्थीले तोडफोड गरेका हुन् । तोडफोडको क्रममा केही विद्यार्थी घाइतेसमेत भएका छन् ।

विवाद साम्य नहुन्जेल कक्षा रोक्ने सहमतिविपरीत नोबेलले कक्षा चलाएपछि एमबिबिएस प्रथम वर्षका विद्यार्थीहरू आन्दोलनमा उत्रिएका थिए । उनीहरूलाई साथ दिन पुगेका विद्यार्थी संगठनका नेताहरूले नोबेल कलेजमा तोडफोड गरेका हुन् ।

अहिले नोबेल परिसर तनावग्रस्त बनेको छ । नोबेलले गत बिहीबार स्थानीय प्रशासनसँग कुनै पनि अतिरिक्त शुल्क नलिने, विवाद साम्य नभएसम्म कक्षा नचलाउने सहमति गरेको थियो । तर आज पनि थोरै विद्यार्थी राखेर कक्षा चलाएपछि फेरि तनाव उत्पन्न भएको हो ।