माओवादीको बन्दसत्र : को को छन् अध्यक्षमण्डलमा ?

काठमाडौँ । नेकपा (माओवादी केन्द्र) को आठौं महाधिवेशन अन्तर्गत सोमबार बन्दसत्र चलिरहेको छ। बन्दसत्र सञ्चालन गर्न सात सदस्यीय अध्यक्षमण्डल गठन गरिएको छ।

पार्टी प्रवक्ता एवं पूर्वसभामुख कृष्णबहादुर महरा, गिरिराजमणि पोखरेल, गणेश साह, परशुराम तामाङ, परशुराम रम्तेल, पूर्णाकुमारी सुवेदी र रूपा श्रेष्ठ रहेको अध्यक्षमण्डल बनाइएको हो।

सोमबार बिहान अध्यक्षमण्डल गठनमा ढिलाइ हुँदा महाधिवेशनअन्तर्गतको बन्दसत्रसमेत निर्धारित समयभन्दा ढिलो सुरु भएको थियो।

बन्दसत्रमा पार्टी अध्यक्ष पुष्पकमल दाहालले राजनीतिक प्रतिवेदन प्रस्तुत गरिरहेका छन्। उक्त प्रतिवेदनमा २८ वटा समूह बनाई छलफ गर्ने माओवादीको तयारी रहेको छ।

काठमाडौँको कमलादीस्थित प्रज्ञा भवनमा शनिबार सुरु भएको माओवादी केन्द्रको आठौं महाधिवेशन बिहीबारसम्म चल्नेछ। महाधिवेशनले पार्टीको नयाँ नेतृत्वअन्तर्गत १५ पदाधिकारीसहित २९९ सदस्यीय केन्द्रीय समिति चुन्नेछ।