जाजरकोट बस दुर्घटना अपडेट : ३ जना मृतकको सनाखत

जाजरकोट । जाजरकोटमा बस दुर्घटनामा परी मृत्यु हुनेमध्ये ३ जनाको सनाखत भएको छ । बाँकी २ जनाको भने सनाखत हुनसकेको छैन ।

नेपालगञ्जबाट जाजरकोटको कालीमाटीतर्फ जाँदै गरेको ना६ख २७५७ नम्बरको बस आज बिहान साढे २ बजेतिर जाजरकोटको भेरी नगरपालिका १३ बराहचौर भन्ने स्थानमा दुर्घटना भएको थियो ।

सो दुर्घटनामा मृत्यु हुनेमा नलगाड ३ करुवाका शेरबहादुर परियार, आठबिसकोट ४ की दिब्या शाही र सप्तरी राजविराज १ घर भएका र हाल दीपेन्द्र आधारभूत विद्यालय सक्ला जाजरकोटमा कार्यरत गंगाराम यादव रहेका छन् । अन्य दुई जनाको भने सनाखत हुन बाँकी रहेको प्रहरी नायब उपरीक्षक मधुकुमार थापाले जानकारी दिए ।

स्यालले बाटो काटिरहेका बेला जोगाउन खोज्दा गाडी पल्टिएको चालक चित्रबहादुर देनारले बताएको प्रहरीले जानाएको छ। चालकलाई प्रहरीले नियन्त्रणमा लिएको छ । उनी घाइते छन् ।

बस सडकभन्दा करिब १ सय ५० मिटर तल खसेको थियो । जाजरकोटका प्रहरी डीएसपी मधुकुमार थापाका अनुसार बसमा ३२ जना यात्रु सवार थिए ।