सिन्धुपाल्चोकको हेलम्बुमा बस दुर्घटना, एकको मृत्यु,  पाँच घाइते

सिन्धुपाल्चोक । सिन्धुपाल्चोकको हेलम्बु - ७ इचोकबाट काठमाडौँका लागि छुटेको यात्रुवाहक बस इचोकमा दुर्घटनामा परेको छ । बस दुर्घटना हुँदा एक जनाको ज्यान गएको छ । पाँच जना घाइते भएका छन् ।

सिन्धु हेलम्बु यातायात प्रालिको  बा ४ ख ५८१५ नं को बस हेलम्बुको इचोकमा आज बिहान दुर्घटनामा परेको हो । दुर्घटनामा हेलम्बु–३ पाल्चोककी ५५ वर्षीया पासाङ तामाङको ज्यान गएको इलाका प्रहरी कार्यालय हेलम्बुले जानकारी दिएको छ ।

घाइते हुनेमा हेलम्बु - ६ का अनुज तामाङ, ‍त्यही ठाउँका पासाङ दोर्जे, साजन तामाङ, जङ्बु तामाङ, हेलम्बु - ७ का आयुष पण्डित रहेका इलाका प्रहरी कार्यालय हेलम्बुका प्रहरी नायब निरीक्षक सुनिल थापाले जानकारी दिए ।  

घाइतेको उपचारका लागि धुलिखेल अस्पताल लगिएको छ । बस चालकलाई  प्रहरीले  नियन्त्रणमा लिइ अनुसन्धान सुरु गरेको छ । ब्रेक फेल भएर दुर्घटना भएको इलाका प्रहरी कार्यालय हेलम्बुले जानकारी दिएको छ ।