सर्वोच्चले आज पनि हेरेन हत्या आरोपी सभामुख सापकोटाविरुद्ध परेको मुद्दा

काठमाडौँ । हत्याका आरोप लागेका सभामुख अग्निप्रसाद सापकोटविरुद्ध लगाइएको विचाराधीन मुद्दा हेर्न नमिल्नेमा परेको छ । यसअघि भदौ १६ गते पनि मुद्दा पेशीमा चढेर हेर्न नमिल्नेमा राखिएको थियो ।

प्रधानन्यायाधीश चोलेन्द्र शमशेर जबरा नेतृत्वको संवैधानिक इजलासमा दीपककुमार कार्की, मीरा खड्का, हरिकृष्ण कार्की र ईश्वरप्रसाद खतिवडाको इजलासमा पेशी चढेको मुद्दा हेर्न नमिल्नेमा परेको हो।

सशस्त्र द्वन्द्वकालमा काभ्रेका अर्जुन लामाको हत्यामा संलग्न रहेको आरोप सापकोटामाथि लागेको छ। २०६२ साल वैशाख १६ गते श्रीकृष्ण मावि दाप्चाबाट उनी अपहरणमा परेका थिए ।

साउन तेस्रो साता खाल्डो खनेर लामालाई जिउँदै पुरेको भन्दै उनकी श्रीमती पूर्णिमायाले २०६४ सालमा जाहेरी दिएकी थिइन्।