रसुवागढीबाट सवारीसाधन भित्रिने क्रम बढ्दो

रसुवा । उत्तरी नाका रसुवागढीबाट चीनमा निर्मित सवारीसाधन भित्रने क्रम बढ्दै गएको छ।

चालू आर्थिक वर्षको गत साउनदेखि हालसम्म ट्रक डम्फर ३५, मिनि बस ६, माइक्रोबस १६, कङ्क्रिट मिक्सरलरी ३, डेलिभरी भ्यान २, ठूलो क्रेन एक, ब्याट्रीबाट चल्ने विद्युतीय कार ४, ट्रेलर ५८, विद्युतीय मोटर १६, विद्युतीय स्कुटर ४, ट्रक ६ र साइकल ३६ आयात भएको प्रमुख भन्सार अधिकृत रामप्रसाद रेग्मीले जानकारी दिए।

गत आवमा रसुवागढी नाकाबाट साना–ठूला गरी ५६८ सवारीसाधन भित्रिएको थियो। यस वर्षमा सवारीसाधनको आयात भारी मात्राले बढ्ने सङ्केत देखिएको हो। कोभिड रोगको सङ्क्रमण बढेसँगै चिनियाँ सवारीसाधन रसुवागढीको मितेरी पुलसम्म चिनियाँ सवारी चालकले ल्याउने गरेको र भन्सार जाँचपास भएपछि नेपाली चालकले आफ्नो गन्तव्यतर्फ लाने गरेको सो कार्यालयका प्रवक्ता नरेन्द्र चौधरीले बताए।

निर्माणाधीन विभिन्न जलविद्युत आयोजनाको लागि आवश्यक पर्ने उपकरणसमेत रसुवागढी नाकाबाट आयात भइरहेको कार्यालयले जनाएको छ। आयात हुने अन्य सामग्रीमा तयारी पोशाक, मोबाइल फोन, जुत्ता, चप्पल, कम्प्युटरका पार्टस्, विद्युतीय पार्टपुर्जा, स्याउ, ओखर, लसुन, थर्मसलगायत छन्।

त्यस्तै बडादसैँ नजिकिँदै व्यवसायीले स्याउ आयातमा समेत तिव्रता दिन थालेका छन्। यही असोज १ गतेदेखि बुधबारसम्म २४ कन्टेनर अर्थात २४० टनभन्दा बढी परिमाणको स्याउ आयात भइसकेको छ। व्यवसायी धर्म पौडेलका अनुसार नेपाली बजारको माग आपूर्ति सहज पार्न फलफूलको साथसाथै सबै प्रकारका सामग्री आयातको व्यवस्थापनमा व्यापारी व्यवसायी व्यस्त छन्।

उत्पादक कम्पनीलाई सामान माग गरेपश्चात छिटो छरितो तवरले चिनियाँँ मुसा टासपोर्ट कम्पनीले रसुवागढीसम्म ढुवानी गर्ने गरेको बताइन्छ। चालू आवको साउनदेखि हालसम्म चीनबाट आयात भएका सामग्रीबाट नियमानुसारको शुल्कबापत कूल रु एक अर्ब ५९ लाख नौ हजार ४८ राजस्व असुली भएको छ। इन्टरनेट तथा विद्युतको अवरोध भइरहँदा आयात भएका सामग्रीको जाँचपासमा कठिन भएको छ।

रसुवामा प्रायः सबै प्रकारका प्रविधि भित्रिए पनि दिगो र भरपर्दाे हुन सकेको छैन। इन्टरनेटकै अभावमा भन्सार राजस्व असुलीमा बाधा पुगिरहेको भन्सार कार्यालयले जनाएको छ। कार्य सञ्चालन गर्न विद्युतका लागि जेनेटर प्रयोग गर्ने गरिएको र इन्टरनेट सञ्चालनको लागि नेपाल टेलिकमसँग अनुरोध भइरहेको प्रमुख भन्सार अधिकृत रेग्मीले जानकारी दिए। अधिकांश समय स्याफ्रुबेँसीदेखि रसुवागढीसम्मको राजमार्ग अवरूद्ध भइरहँदा जाँचपास भएका मालबाहक सवारीसाधन पार गराउन तीन दिन लाग्ने समस्या भइरहेको बताइन्छ।