काठमाडौंको बलम्बुस्थित कोभिड विशेष अस्पतालमा कांग्रेस नेता रञ्जितको मृत्यु

काठमाडौं । काठमाडौंमा थप १ जना कोरोना संक्रमितको मृत्यु भएको छ । मृतक नेपाली कांग्रेसका काठमाडौं महानगर वडा नं. २१ का इकाइ सभापति गोविन्द रञ्जित रहेका हुन् ।

नेता रञ्जितको आज दिउँसो सवा १२ बजे बलम्बुस्थित सशस्त्र प्रहरी अस्पतालमा उपचारका क्रममा निधन भएको हो । उनी निमोनियाबाट समेत ग्रसित रहेको चिकित्सकहरुले बताएका छन् ।

२०३६ सालदेखि विद्यार्थी आन्दोलनबाट राजनीतिक जीवन यात्रा प्रारम्भ गरेका रञ्जितले पार्टी संगठन र नेपालको लोकतान्त्रिक आन्दोलनहरुमा सक्रिय भूमिका निर्वाह गरेको नेपाली कांग्रेसले जनाएको छ ।

उनको निधनप्रति नेपाली कांग्रेसका सभापति शेरबहादुर देउवाले गहिरो दुःख व्यक्त गरेका छन् । सभापतिको तर्फबाट विज्ञप्ति सार्वजनिक गर्दै पार्टी मुख्य सचिव कृष्णप्रसाद पौडेलले उनको निधनप्रति दुःख व्यक्त गरेका हुन् ।

योसँगै मुलुकभर कोरोनाबाट मृत्यु हुनेको संख्या १५८ पुगेको छ । हालसम्म नेपालमा ३२ हजार ६ सय ७८ संक्रमित भेटिएका छन् । तीमध्ये १८ हजार ८ सय ६ जना निको भएर घर फर्किसकेका छन् ।