असार ३ र ४ गते अन्तर्राष्ट्रिय सूचना प्रविधि सम्मेलन हुने

काठमाडौं । कम्प्युटर एशोसिएशन नेपाल महासंघको आयोजनामा काठमाडौंमा अन्तर्राष्ट्रिय स्तरको सूचना तथा संचार प्रविधि सम्मेलन आयोजना हुने भएको छ ।

महासंघले सोमबार काठमाडौंमा पत्रकार सम्मेलन गरी यही असार ३ र ४ गते अन्तर्राष्ट्रिय स्तरको सूचना तथा संचार प्रविधि सम्मेलन गरिने जानकारी दिएको हो ।

देशका विभिन्न भागमा स्मार्ट सिटी बनाउने सरकारको परिकल्पनालाई आवश्यक सुझाव दिने उद्देश्यका साथ सूचना र प्रविधिसम्बन्धि अन्तर्राष्ट्रिय सम्मेलन आयोजना गर्न लागिएको महासंघका महासचिव रञ्जित पोदारले बताए ।

२ दिनसम्म चल्ने सम्मेलनमा चीन, भारत, मलेसिया, सिंगापुर, श्रीलंका, बंगलादेश, दक्षिण कोरिया, संयुक्त राष्ट्रसंघीय विकास कार्यक्रमका विषयगत विज्ञहरु सहभागी हुनेछन् ।

अर्थमन्त्री डा. युवराज खतिवडाले उद्घाटन गर्नेे सम्मेलनमा स्थानीय र प्रदेश सरकारका प्रतिनिधिहरुको पनि उल्लेख्य सहभागिता हुने अपेक्षा गरिएको छ । सम्मेलनले नेपाललाई आधुनिक सूचना प्रविधिको क्षेत्रबारे विस्तृत जानकारी दिने महासंघको दावी छ ।