मोटरसाइकलको अन्धाधुन्ध ठक्करबाट एक जनाको मृत्यु, नौ घाइते

नवलपरासी । नवलपरासी जिल्लाको मध्यविन्दु–१, चिसापानीका पृथबहादुर केसीको चौरासी पूजाका सहभागीलाई अनियन्त्रित मोटरसाइकलले अन्धाधुन्ध ठक्कर दिँदा एक जनाको ज्यान गएको छ भने ९ जना घाइते भएका छन् ।

सहभागीलाई १६ प ९९९ नम्बरको मोटरसाइकलले ठक्कर दिएको हो । ठक्करबाट मध्यविन्दु–१ गुडचरी निवासी ७० वर्षीय कमल काफ्लेको ज्यान गएको छ । जिल्ला प्रहरी कार्यालय, नवलपुरका अनुसार, घाइतेमध्ये २ को अवस्था गम्भीर छ । घाइतेहरुको विभिन्न अस्पतालमा उपचार भइरहेको छ ।

प्रहरीले मादक पदार्थ सेवन गरेका राजेश बोहोराले चलाएको मोटरसाइकल अनियन्त्रित भएर चौरासी पूजामा बत्तिँदा १ मृत्यु र ९ जना घाइते भएको जानकारी दिएको छ ।

सामान्य घाइते बोहरालाई प्रहरीले नियन्त्रणमा लिएर अनुसन्धान सुरु गरेको छ ।