शक्ति देखाउँछु भन्दै दुई झाँक्री कर्णाली नदिमा हाम फाले, एकको शव फेला एक बेपत्ता

बाजुरा । शक्ति देखाउँछु भन्दै आइतबार बिहान कर्णाली नदिमा हाम फालेका दुई जना झाँक्रीको मृत्यु भएको छ ।

शक्ति प्रदर्शन गर्न कर्णालीमा हाम फालेका दुई मध्ये एकलाई मृत अवस्थामा फेला परेका छन भने,एक जना बेपत्ता रहेका छन् । यसले धामी झाक्रीमा कतिसम्म अन्धविश्वास हुन्छ भन्ने यहाँको एउटा घटनाले पुष्टि गरेको छ ।

झाक्रीद्धय जगन्नाथ गाउँपालिका १ बस्ने ६१ वर्षीय मान सिं बिष्ट र ५३ वर्षीय जयबहादुर बिष्टले बासिन्दालाई शक्ति देखाउन नदिमा हाम फालेका हुन् ।

हाम फालेका मध्ये मान सिंको शव भेटिएको छ । जयबहादुर भने बेपत्ता छन् ।  प्रमुख जिल्ला अधिकारी लुकबहादुर क्षेत्रीले जयबहादुरको खोजी भइरहेको जानकारी गराएका छन् ।