प्रविधिको पहुँच दूरदराजसम्म पु¥याइनुपर्छ : सञ्चार राज्यमन्त्री

काठमाडौँ । सञ्चार तथा सूचना प्रविधि राज्यमन्त्री गोकुलप्रसाद बाँस्कोटाले सूचना तथा सञ्चार प्रविधिको पहुँच देशका ग्रामीण भेगका दूरदराजसम्म पु¥याइनुपर्ने बताएका छन् ।

‘‘इन्टरनेशनल गल्र्स इन आइसिटी डे’ को अवसरमा सञ्चार तथ सूचना प्रविधि मन्त्रालय र नेपाल दूरसञ्चार प्राधिकरणले संयुक्त रुपमा आज यहाँ आयोजना गरेको कार्यक्रममा उनले सूचना प्रविधिको पहुँच शहर र सुविधायुक्त क्षेत्रमा मात्र केन्द्रित रहेको भन्दै यसलाई गाउँका कुना कुनासम्म पु¥याउन प्रभावकारी कार्यायोजना अघि बढाइनुपर्ने खाँचो औँल्याए ।

राज्यमन्त्री बाँस्कोटाले सूचना प्रविधि मुलुकमा समृद्धि प्राप्त गर्ने महत्वपूर्ण आधार बन्ने उल्लेख गर्दै आधुनिक सूचना प्रविधिको कसरी अधिकतम उपयोगिता बढाउने भन्नेतर्फ ध्यान दिन सरोकार भएका निकायको ध्यानाकर्षण गराएका छन् ।

उनले भने, ‘मानव जीवनमा परिवर्तन ल्याउने महत्वपूर्ण आधार आइसिटीको सही सदुपयोग आजको आवश्यकता हो । अनुसन्धान, नवनिर्माण र मानव जीवनको उपयोगितामा प्रयोग गर्न सके यसले जनताको जीवनस्तर सुधार्न मद्दत पुग्छ तर, प्रविधिको दुरुपयोग भयो भने मुलुकलाई बर्बादीतर्फ लैजान सक्छ । त्यसैले सूचना प्रविधिको विकास र प्रयोगलाई सही ढंगले सदुपयोग गर्नुपर्छ ।’

महिला, बालबालिका तथा ज्येष्ठ नागरिक मन्त्रालयका सचिव ङइन्द्रप्रसाद उपाध्यायले सूचना प्रविधिको असाधारण अवसर दिनप्रतिदिन बढ्दै गइरहेको र यसमा महिलाको पहुँच वृद्धि गर्न सकिए राज्यलाई सहयोग पुग्ने विश्वास व्यक्त गरे ।

राष्ट्रिय महिला आयोगका सचिव अनिलकुमार ठाकुरले सूचना प्रविधिको प्रयोगबाट महिलाको सशक्तीकरण तथा सामाजिक संस्कारको विभेद न्यूनीकरणमा महत्वपूर्ण सहयोग पुग्ने धारणा राखे ।

नेपाल दूर सञ्चार प्राधिकरणका वरिष्ठ निर्देशक आनन्दप्रसाद खनालले प्रविधिमा महिलाको पहुँच अभिवृद्धि गर्ने गरी प्राधिकरणले नीतिगत कार्यक्रम ल्याउने बताए । सन् २०१० र २०१४ मा सम्पन्न आइटियु सम्मेलनको निर्णय अनुसार नेपालले सन् २०१३ देखि यो दिवस मनाउन थालेको हो ।

सो अवसरमा सूचना प्रविधिको क्षेत्रमा महत्वपूर्ण योगदान पु¥याउने तिमिला यमी थापा, गुणकेशरी प्रधान, रत्नतारा वैद्यलगायतलाई सम्मान गरिएको थियो ।