६६ युनिट रगत संकलन

स्याङ्जा । सन्त निरङ्कारी मण्डलले मानव एकता दिवसको अवसर पारेर आज ६६ युनिट रगत संकलन गरेको छ ।

स्याङ्जाको भिरकोट नगरपालिका–१ बयरघारीमा रहेको सन्त निरङ्कारी मण्डलले आयोजना गरेको रक्तदान शिविरमा ६६ जनाले रक्तदान गरेका हुन् ।

रक्त सञ्चार केन्द्र पोखराको प्राविधिक सहयोगमा गरिएको रक्तदान शिविरमा ३७ पुरुष र २९ महिलाले रक्तदान गरेका सन्त निरङ्कारी मण्डलका अध्यक्ष यामबहादुर खत्रीले बताए ।

‘विगत १० वर्षअघिदेखि हामीले प्रत्येक वर्ष २४ अप्रिल अर्थात् मानव एकता दिवसको अवसर पारेर रक्तदान शिविर सञ्चालन गर्दै आएका छौँ,’ अध्यक्ष खत्रीले भने, ‘रक्तदान नै जीवनदान भन्ने मान्यताअनुरुप हामीले रक्तदान शिविर निरन्तर सञ्चालन गर्दै आएका हौँ ।’

संस्थाले रक्तदानसहित समय समयमा भिरकोट नगर सरसफाइ तथा विभिन्न सामाजिक कार्य गर्दै आएको छ । आज संकलन भएको रगत रक्त सञ्चार केन्द्र पोखरामा रहने अध्यक्ष खत्रीले बताए ।