धरानमा दिउँसै चल्यो गोली

धरान । प्रहरीले कर्तव्य ज्यान मुद्दाका फरार अभियुक्तलाई पक्राउ गर्न एक राउण्ड गोली चलाएको छ ।

मंगलबार ज्यान मुद्दमा फरार अभियुक्तलाई पक्राउ गर्न प्रहरीले धरान–१५ स्थित श्याम चोक र पानबारीको बीचमा रहेको जंगलमा गोली चलाएको हो ।

प्रहरीले गोली चलाएर स्थानीय १८ वर्षीय कुम्वे राईलाई पक्राउ गरेको छ उनलाई लखेट्दै गएको प्रहरी टोलीलाई राईले ढुंगा प्रहार गर्न थालेपछि एक राउण्ड फायर गरिएको इलाका प्रहरी कार्यालय, धरानले जनाएको छ ।

सोमबार साँझ कुम्वेको समूहले पूर्वाञ्चल इञ्जिनियरिङ क्याम्पसमा पढ्दै गरेका विद्यार्थी सुजन खड्का र प्रदीप सापकोटालाई छुरा प्रहार गरेका थिए । उनीहरुमाथि ज्यान मार्ने उद्योग अन्तरगत मुद्दा चलाइएको छ ।

सामान्य रिसिबीका क्रममा उनीहरुले दुई जनालाई छुरा प्रहार गरेका थिए । सो घटनामा संलग्न रहेका कुमार र विज्ञान लिम्बु सोमबारै पक्राउ परेका थिए ।