आमालाई पुनर्जिवित गर्न छोराले शवलाई तीन वर्षसम्म घरमा राखे ?

बीबीसी

आजभन्दा तीन वर्ष अघि ८७ वर्षको उमेरमा उनकी आमाको मृत्यु भयो । उनले आमाको शवलाई अस्पतालबाट घर ल्याए ।

तर उनको आमाको अन्तिम संस्कार कहाँ र कसरी गरियो भन्ने बारे कसैलाई पनि थाहा भएन । न त उनका छिमेकीलाई केही गलत भइरहेको छ भन्ने लाग्यो त्यसैले त कसैले पनि यसबारे एकपटक पनि सोधेनन् ।

तर गत बुधबार आधा रातमा पुलिसलाई एउटा फोन आयो जसको आधारमा उनीहरुले भारतको दक्षिण कोलकालाको बेहाला इलाकाको एउटा घरमा छापा मारे ।

बेहालाको मध्यवर्गीय इलाकामा दुई तल्ले एक घरमा पुलिसले अनुसन्धानमा जे पाए त्यसले मानिसहरुमा कौतुहल पैदा गरिदियो ।

दक्षिण कोलकाताका डीएसपी निलांजन विश्वासले अनुसन्धान गर्दा एउटा ठूलो फ्रिजरमा एक वृद्धाको शव भेटिएको बताए । उनले भने, ‘हामीलाई एक सूत्रले उक्त घरमा शवलाई वर्षौंदेखि बचाएर राखिएको भन्ने जानकारी दिए । जब हामीले छापा मार्यौं तब एउटा ठूलो फ्रिजर भित्र एक वृद्धाको शव भेट्यौं । उक्त शवलाई रसायनको माध्यमले बचाएर राखिएको थियो ।’

‘अनुसन्धान गर्दा उक्त शव सन् २०१५ को अप्रिलमा एक अस्पतालमा मृत्यु भएको बिना मजूमदारको भन्ने थाहा भयो । ’ उनले भने, ‘उनको शवलाई उनका छोरा शुभब्रत मजूमदारले अन्तिम संस्कार नगरी घरभित्रै राखेका रहेछन् ।’

उनका अनुसार शुभब्रतले एउटा ठूलो फ्रिजरभित्र केमिकलको प्रयोग गरेर आफ्नी आमाको शवलाई त्यसमा राखेका थिए । आमाको पेटबाट कलेजो र आन्द्रा निकालेर पुनः टाँका लगाएपछि शवलाई फ्रिजरमा राखिएको उनीहरुले पत्ता लगाए ।

वैज्ञानिक तरिकाले गरे शवलाई सुरक्षितः

पुलिसले उक्त घरबाट मानव अंग राखिएका केही बोतल पनि फेला पारेको बताए ।

प्राचिन इजिप्टमा मानव शवलाई संरक्षण गर्नका लागि केही विशेष तरिका अपनाइन्थ्यो । उनले त्यही तरिका अपनाएको पुलिसले जानकारी दिएको छ ।

शुभब्रतलाई पुलिसले पक्राउ गरेपनि उनले जमानत पाएका छन् । यद्यपी, जमानत पाएपछि उनलाई मानसिक अस्पताल पुर्याइएको छ ।

शुभब्रत आफूलाई ‘लेदर टेकनिक’ का जानकार बताउँछन् ।

फोरेन्सिक जानकारका अनुसार सायद उनले आफ्नो पढाईको क्रममा छालालाई सुरक्षित राख्ने उपाय बारे जे पढेका थिए त्यसै जानकारीको प्रयोग गरेका हुन् ।

अनुसन्धानको क्रममा शुभब्रतले भने, ‘मेरी आमा मेरो निकै नजिक थिइन् त्यसकारण उनलाई म पुनः जिवित बनाउन चाहन्छु ।’

पुलिस भन्छन्, ‘आमाको शवलाई सुरक्षित गरेर राख्दा यसै शरिरसँग उनी जिउँदो हुन्छिन् भन्ने उनलाई लागेको रहेछ । हामीले केही किताब र जर्नल पनि बरामद गरेका छौं जसमा शवलाई कसरी सुरक्षित गर्ने भन्ने बारे र पुनर्जिवनको सिद्धान्तबारे बताइएको छ ।’

शुभब्रत आफू मात्र यस्तो कुरामा विश्वास गर्दैनथे । उनले आफ्ना ९० वर्षीय बुवालाई पनि यस्तो हुनसक्छ भनी विश्वास दिलाएका थिए । उनका पिता उनीसँगै त्यसै घरमा बस्छन् ।

छिमेकीलाई बीना मजूमदारको मृत्युबारे थाहा थियो तर उनको शवलाई मुर्दाघरमा राखिएको छ भन्ने जानकारी प्राप्त भयो । पछि उनीहरुले पनि यस विषयमा सोधपुछ गर्न छोडिदिए ।

के यसको उद्देश्य पेन्सन थियो ?

के वास्तवमा नै शुभब्रत आफ्नी आमालाई पुनर्जीवित गर्न चाहन्थे वा यसको पछाडि कुनै अन्य कारण थियो ?

पुलिसले यस विषयमा आर्थिक फाइदालाई अस्विकार गरेको छैन ।

डिसीपी विश्वास भन्छन्, ‘शुभब्रतका आमा–बुवा फूड कर्पोरेशनमा काम गर्दथे र सेवानिवृत्तपछि उनीहरुले पेन्सन पाइरहेका थिए । तर पेन्सनरको मृत्युपछि पेन्सन पाउन बन्द हुन्छ ।’

‘तर उनको छोराले आमाको मृत्यु भएको तीन वर्षसम्म पनि लगातार पेन्सन निकालिरहेको भेटिएको छ ।’ उनले भने, ‘उनको छोरासँग डेबिड कार्ड छ र लगातार आमाको पेन्सन खाताबाट  पैसा निकालिरहेको भेटिएको छ ।’

उनले एक मृत व्यक्तिको अकाउन्टबाट यति लामो समयसम्म कसरी पैसा निकालिरहेका छन् यो कुरा भने स्पष्ट हुन सकेको छैन ।

के उनले आफ्नी आमाको अकाउन्ट चलाइराख्नका लागि नक्कली लाइफ सर्टिफिकेट दिए ? के यसका लागि आफ्नी आमाको औंठा छापको प्रयोग गरे र यसका लागि उनको शव सुरक्षित गरेर राखेका हुन् ? के यो मुद्दामा बैंक पनि संलग्न छ ?

डिसिपि निलांजन विश्वास भन्छन्, ‘यसबारे हामीलाई धेरै जानकारी छैन । हामीले यसबारे बैंकलाई सुचित गरिसकेका छौं । उनीहरुबाट पूर्ण जानकारी पाएपछि मात्र यसबारे टिप्पणी गर्न सक्नेछौं ।’